مع وقف التنفيذ بقلم دعاء عبد الرحمن ج3
أومأ براسه موافقاً وهو يقول :
– انا مش افتكر ..انا متأكد يا حبيبتى …بس مستنى فارس لما يحكيلى بنفسه ..
طب لما هى الحكايه كده أتجوز مراته دى ليه …حاجه غريبه اوى
شردت عبير بعيدا أكثر وأكثر وهى تقول فى نفسها :
– ياااه يا عزه ده انتى ربنا بيحبك اوى اوى ..
أهى خطيبته اللى اتجوزها وانتى افتكرتى أنه فضلها عليكى أهى طلعت فى الاخر برده مخدتش حاجه غير وجوده معاها
لكن قلبه فى مكان تانى خالص مكان ابعد ما كنا نتخيل …ياااه قد ايه ربنا رحيم بينا أكتر من نفسنا ..
************************************
وقفت عزه أمام الفراش تحاول جاهدةً ايقاظ عمرو بشتى السبل ولكنها تفشل دائماً
فما كان منها إلا أن جاءت بزجاجه مياه باردة وسكبت بعضاً منها على رأسه …هب جالساً فى فراشه وهو يصيح :
– ايه يا ماما شغل المكوجيه ده على الصبح
عقدت ذراعيها أما صدرها وقالت ساخره:
– ماما مين يا حبيب ماما أنت وبعدين صبح ايه أحنا العصر يافندى
نظر إليها وهو يفرك عينيه بقوة وقال متذكرا:
– عزه حبيبتى ..أه صحيح ده احنا اتجوزنا امبارح وزغاريد بقى وحركات
ثم نظر إليها بعين مفتوحه والاخرى مغمضة وقال متسائلا:
– اه صحيح هو حصل ايه بعد الزغاريد انا مش فاكر حاجه
ضحكت وهى تشير للخارج قائلة:
– لو مش فاكر اروح اجيب ازازة العصير افكرك بيها ها
اشار إليها يستوقفها وهو ينهض متثاقلاً ويقف امامها قائلا:
– خلاص انا صحيت أهو ..ثم احاط خصرها بذراعيه وهو يقول :
– صباح الخير يا عروستى
ابتعدت عنه وقالت بحزن مصطنع:
– لا انا زعلانه منك ..أنت عارف أنك راحت عليك صلاة الجمعة حتى الظهر مصلتوش وأهو العصر كما اذن عليك ..
ينفع كده يا عمرو من اولها هتجمع الصلاة
مط شفتيه وعقد جبينه وقال معتذراً :
– انا اسف والله يا حبيبتى كنت تعبان اوى معلش أوعدك مش هيتكرر ده تانى
ولف ذراعيه حول كتفيها قائلاً بمرح :
– خلاص صافى يالبن
رفعت كتفيها وأستدارت وهى تشير للخارج قائلة بحسم :
– طب اتفضل بقى على الحمام علشان تلحق اللى فاتك
رفع حاجبيه وقال بصرامة مضحكه:
– ده طلب ولا امر ؟!!
رفعت جابيها مثله وقالت :
– لا أمر
سار امامها مطيعاً وهو يقول :
– اه افتكرت ..ايوة كده اتعدلى معايا
خرج من الحمام وصلى ما فاته من صلوات وبمجرد ان أنتهى سمع صوت قرع جرس الباب ووجد عزه تدخل عليه مسرعة وهى تقول:
– عمرو عمرو يالا تعالى افتح الباب بسرعة
قال بسرعة وهو يتوجه للمطبخ :
– روحى افتحيلهم على ما اضربلى كام سندوشت على السريع كده
قالت بخجل :
– لا يا سيدى افتح انت انا مكسوفه
هز راسه نفياً وقال :
– يعنى اموت من الجوع علشان سيادتك مكسوفه أمشى يا بت افتحى الباب
