مع وقف التنفيذ بقلم دعاء عبد الرحمن ج3
ضربت المكتب بقبضتها وهى تقول بضيق :
– لو كان لوحده كان طلعه بسهوله المشكله فى الاتنين اللى معاه علشان كده بيقولى الموضوع هياخد وقت
قال صلاح بحزن :
– يعنى الولد المسكين ده هيفضل مرمى كده من غير ذنب
قالت بعصبية :
– مش قادره اعمل اكتر من كده يا صلاح انا وصلت لأعلى المستويات كل اللى وعدونى بيه أن محدش هيقربله وهيفضل هناك معزز مكرم لحد ما يطلع ..
خبطت سطح مكتبها مرة أخرى حتى آلمتها قبضتها ففركتها بغيظ وضيق وهى
تقول :
– لو كان لوحده كنت عرفت اطلعه النهارده المشكله فى الاتنين اللى مربين دقنهم اللى معاه دول .. انا عارفه ايه الاشكال اللى بيعرفها دى ..!!!
********************************
فُتح باب العنبر مرة أخرى فتعلقت أبصار الجميع به .. دخل الشاويش المسئول عن العنبر وتقدم بأتجاه عمرو وفارس وبلال
واشار إليهم بحزم وقسوة قائلا:
– تعالوا معايا أنتوا التلاته
نظر ثلاثتهم إلى بعضهم البعض بتسائل فصرخ بهم بصوت كريه مرة اخرى :
– بقول قوم انت وهو
نهض ثلاثتهم وهم ينظرون إليه بحنق وتعلقت به أبصار شركائهم فى العنبر وهم ينظرون إليهم بشفقة ..
سار ثلاثتهم خلفه وبعد أن أغلق العنبر أمرهم ان يسيروا خلفه .. ساروا قليلاً حتى توقف بهم أمام أحد الزنازين وشرع فى فتح بابها وهو يقول متبرماً :
– حظكوا من السما … فتح الزنزانة ثم دفعهم داخلها بقسوة مرة أخرى وأغلقها خلفهم
كانت الزنزانة أقل عددا من العنبر بكثير فلا يوجد فيها إلا خمسون رجلاً فقط ..
أما العنبر فكان به حوالى ثلاثمائة رجل .. ولقلة العدد فيها كانت تبدو أكثر آدمية من التى قبلها ..
والفُرش والاغطية كانت تبدو أكثر راحه من العنبر نوعاً ما …نظر زملائهم إليهم متسائلين كما يُفعل مع كل مُعتقل جديد
فألقى بلال السلام ..أجابة الجميع بنفس واحد خافت :
– وعليكم السلام ورحمة الله وبركاته
ألقى ثلاثتهم أجسادهم على فُرُشِهم بإنهاك الشديد ولاول مرة تذوق عيونهم طعم النوم منذ أعتقالهم …
بعد ساعة استيقظ بلال على هزات خفيفة .. أنتبه من نومه دفعة واحدة بإنفعال فربت الرجل الذى كان يوقظه على صدره يهدئه
وهو يقول :
– أهدى يا اخى أنا بصحيك علشان تلحق الصلاة متخافش
نهض بلال وهو يشعر أن عظامه مختلطه ببعضها البعض فى ألم شديد ..توجه إلى فارس وعمرو وأوقظهم بنفس الهزات الخفيفة
فأستيقظوا بنفس الإنتباه المفاجىء واتساع حدقاتهم بإنفعال شديد فطمئنهم وهو يقول :
– يلا قوموا علشان نلحق الصلاه
