مع وقف التنفيذ بقلم دعاء عبد الرحمن ج3
بدأت دموع هانى تنهمر بشدة وهتف صائحاً :
– أنا تبت لربنا تبت وندمت وربنا هيقبل توبتى انا متأكد
وضع فارس يده على كتفه وهزه بقوة وهو يقول :
– ممكن ربنا يقبل توبتك اه لما تغلط فى حق نفسك وبس ..
لكن أنت غلط فى حق انسانه متعلقه فى رقبتك عمرها اللى راح هى واللى كان فى بطنها وشرفها اللى أتنهش ..
يعنى لازم تردلها حقها على الاقل خالص أنك تعترف بغلطك وتتقبل العقوبه بشجاعه مش تنكر وتقول تبت
دفع هانى يد فارس حانقاً وقال :
– أنت عايز منى أيه ..أنت جاى تدافع عنى ولا جاى تلف حبل المشنقة حوالين رقبتى
هز فارس رأسه أسفاً وهو يقول :
– يابنى أنا بنصحك لوجه الله علشان لما عمرك اللى متعرفش هيخلص أمتى ينتهى ..تروح لربك نضيف
قال عبارته الاخيرة وتركه وأتجه لباب الحجرة لينصرف ..ولكنه توقف فجأة عندما سمعه يقول بأنهيار
– أنا لسه شباب هخرج وهعيش حياتى ياما ناس عملت اللى عملته وخرجت وعاشت حياتها
وأستدار إليه متمهلاً وقال :
– ( وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ 42 مُهْطِعِينَ مُقْنِعِي رُءُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاء ) ……
ساعتها هتلاقيها واقفة قدامك عند ميزان أعمالك بتطالب بحقها وتسمع بودنك كلام الله عزوجل وهو
يقول :
(الْيَوْمَ تُجْزَى كُلُّ نَفْسٍ بِمَا كَسَبَتْ لا ظُلْمَ الْيَوْمَ إِنَّ اللَّهَ سَرِيعُ الْحِسَابِ ) …وفتح الباب وخرج وتركه وحيداً يشعر بظلام قلبه وروحه الآثمة الملوثة والمُعذبة ..
***********************************************
بينما كانت أم فارس منشغلةً فى المطبخ تعد طعام الغذاء سمعت طرقاً خفيفاً على باب الشقة فتركت ما فى يدها وأتجهت لتفتح الباب ..أبتسمت وهى تنظر الى مُهرة التى وقفت على أستحياء مطرقةً برأسها وقالت :
– أهلا يا مُهرة يا حبيبتى أتفضلى
قالت مُهرة بخفوت وقد بلغ الخجل منها مبلغة :
– معلش يا طنط مش هقدر أدخل ..
ثم ترددت قبل أن تقول :
– انا بس كنت عاوزه أسأل على حاجه وهمشى على طول
جذبتها أم فارس من يدها وهى تقول :
– تعالى مفيش حد هنا غيرى
دخلت مُهرة وهى تحتضن حقيبة المدرسة بين ذراعيها وأغلقت أم فارس الباب خلفها
فوقفت خلفه ولم تتحرك خطوة واحده وقالت بخجل :
– معلش يا طنط بجد مش هقدر أقعد ..
قالت أم فارس وهى تمسكها من يدها وتتجه للمطبخ :
– طب تعالى معايا فى المطبخ قوليلى اللى أنتى عايزاه لحسن الاكل هيتحرق
