مع وقف التنفيذ بقلم دعاء عبد الرحمن ج3

آخر عبارة نطقها جعلت فارس وبلال ينظران إلى بعضهما البعض ويبتسمان رغماً عنهما ..
مال فارس للأمام وهو يقول له :
– حضرتك العنوان غلط اللى بيعملوا كده الممثلين اللى بيطلعوا فى التلفزيون مش أحنا
نظر له الرجل بتهكم وقال :
– الممثلين دول بيمثلوا حياتكم واللى بتعملوه فى أهلكوا بسبب تشددكوا فى الدين

تدخل بلال قائلا:
– ممكن اسأل حضرتك سؤال ..مش زمان كنا بنسمع أن الممثل علشان يندمج فى الدور بتاعه لازم يروح يعيش فى وسط الناس اللى هيمثل دورهم فى المسلسل
يعنى مثلا كنا زمان نسمع ان واحد راح دخل السجن علشان يعرف يمثل حال المساجين صح ولا لاء

أومأ الرجل براسه قائلا:
– أه طبعا سمعنا كده كتير

ابتسم بلال ثم قال :
– طيب هل الممثل اللى بيمثل دور الملتزم ده بيروح يعيش مع الملتزمين فى بيوتهم وبيشوفهم بيعاملوا أهاليهم أزاى واخوتهم وزوجاتهم

قال الرجل ساخرا:
– هيروح ازاى يا شيخ يعيش معاهم فى بيوتهم هو طبعا بيتصور حياتكوا مع اهاليكوا

رفع بلال حاجبيه وقال بهدوء :
– طيب مش يبقى ده ظلم أنه يحكم علينا اننا بنضرب اخواتنا وزوجاتنا وهو عمره ما عاش وسطنا ونجرجرهم من شعرهم علشان بيسمعوا أغانى ويطلع يمثل كده فى التلفزيون ويخلى الناس تصدق عننا كده وتخاف مننا وأحنا مش بنعمل كده أصلا

تدخل زميلاً آخر لهم وقال :
– والله أنت معاك حق يا شيخ ده ليا جار زيك كده لما مراته بتقعد مع مراتى يرغوا مع بعض شوية بترجع مراتى تقولى أنت مش رومانسى ليه زى جارنا الشيخ

قال الرجل الاول معترضاً :والله بقى أحنا خدنا عنكوا الفكره دى بسبب التشدد اللى أنتوا فيه وكل حاجه حرام حرام حرام حرمتوا علينا عيشيتنا

أتكأ بلال على أحدى جانبيه وقال :
– طب ممكن اسألك سؤال كمان ومعلش تعالى على نفسك وجاوبنى
قال الرجل بملل :
– أتفضل

قال بلال بجدية :
– حضرتك عندك سخان غاز ولا كهربا؟
نظر له الرجل بدهشة وقال متهكماً :
– سخان غاز يا سيدى ليه
ابتسم بلال قائلاً :
– ممتاز … فاكر حضرتك أول مرة ركبته فيها
– فاكر
أعتدل بلال فى جلسته وقال باهتمام:
– يا ترى شغلته لوحدك
زاد الرجل مللاً وهو يجيب قائلاً :
– لاء طبعاً صاحب المحل قالى معاه كتالوج ولازم أمشى على الخطوات اللى فيه الظبط
قصد بلال ان يقول ببرود:
– وسمعت كلامه ليه