مع وقف التنفيذ بقلم دعاء عبد الرحمن ج3
أردف الرجل الاخر :
– أنا لقيوا عندى سيديهات عن الويندوز وتصليحه والبرامج ولقيت وكيل النيابه وهو بيقرا عناوين السيديهات بيقول للى بيكتب جنبه ..
انهم لقيوا سيديهات عن ازاى تركب قنبله وتفجرها عن بعد ومرسومات لكنسية ازاى تتسلق وتدخل تحط قنابل فى اماكن محدش يكتشفها ..وفضلوا يكهربونى لحد ما أغمى عليا خمس مرات ورا بعض
أنتفضت أجسادهم مرة اخرى عندما سمعوا صوت الباب يفتح من جديد وكانوا يظنون أن هناك المزيد من المعذبين سيدخلوا عليهم ولكن هذه المره سمعوا صوت ينادى اسمائهم الثلاث …بلال ..فارس …عمرو
نظروا إلى بعضهم بعضا وكأنهم يودعون بعضهم ويشيعونهم ونظرا إليهم الرجلين نظرات شفقة وخوف زادت من فزعهم …
نهض ثلاثتهم ولكن بلال أمسكهم من أكتافهم ونظر اليهم قائلا :
– حافظوا على دعاء اللهم أكفنيهم بما شئت وكيف شئت …
تقدم الثلاث وهم يرددون الدعاء فى خفوت ولقد كان قلب فارس يُعتصر اعتصارا منذ أن علم أن التعذيب يتم بمعرفة وكيل نيابة مباحث أمن الدوله وتحت نظره ..سار الثلاثة فى رواق ضيق طويل وصدورهم تلهج وتأجر إلى الله سبحانه وتعالى
وبلال يتمتم اللهم إنهم لا يعجزونك اللهم عليك بهم ..
دخل ثلاثتهم غرفة صغيرة أخرى ولكن هذه المره يتوسطها مكتب يجلس خلفه رجل عرفه فارس من اول وهله ..
حدق فارس به لبرهة فنهض الرجل قائلا :
– تعالوا
وجد فارس نفسه يقول دون وعى ..
– أنت ازاى تشوف التعذيب ده وتسكت عليه
قال وكيل النيابه الذى كان زميلاً له فى الكلية :
– مفيش وقت للكلام ده يا فارس كويس أنى عرفت أنك هنا بالصدفه ربنا وحده
هو اللى خلانى اشوف اسمك بالصدفه فى اللى جم أمبارح …..اسمع أنت هتترحل دلوقتى على طره أهو أحسن من هنا على اى حال …
أعاد فارس سؤاله مرة اخرى هاتفاً به ان يجيبه :
فقال وكيل النيابه صديقه :
– يا فارس انا كنت زيك بحلم ابقى وكيل نيابه وربنا حققلى حلمى مكنتش اعرف أنى هشتغل فى أمن الدوله
ولما شفت المهازل اللى بتحصل هنا عملت فيها شجيع وقلت اروح اقدم بلاغ للنائب العام وقبل ما ادخله
قابلت ولاد الحلال اللى يعرفونى وقالولى هو أنت مكنتش تعرف أنه كان بيتشغل فى مباحث أمن الدوله عشر سنين وكان راضى عن اللى بيحصل هتدخل تقوله ايه …
حافظ على نفسك وعيالك وحاول تتنقل لاى جهة تانيه من غير ما تقول حاجه ولا تفتح بؤك …
وانا يا فارس قدمت طلب نقلى وهنفذه قريب والحمد لله انك جيت قبل ما انا أمشى ولا مكنتش هتخرج من هنا على رجلك زى ما دخلت ولا أنت ولا اصحابك أنت متوصى عليك جامد يا فارس
