مع وقف التنفيذ بقلم دعاء عبد الرحمن ج3

أتسعت عين فارس هلعاً ونظر إلى بلال الذى لم تكن الصدمة عليه أقل من فارس .. حدقا فى بعضهما البعض بينما هتف فارس :
– دنيا مراتى .. ازاى وليه .. حضرتك متأكد يا دكتور متأكد أنها مراتى اللى عملت فيا كده

ظهر الأسف على وجة الدكتور حمدى وهو يقول بإشفاق :
– هو ده اللى أنا عرفته ولعلمك محدش هيقدر يجاوب على سؤال ليه ده.. الا أنت بس .. أنت بس اللى ممكن تقولنا ليه هى عملت كده
أعتدل فارس فى جلسته مصدوماً واستند بظهره إلى مقعده وقد أحتقن وجهه غضباً وحنقاً وضرب باب السيارة بقبضة بقوة وهو يهتف :
– سؤال ايه اللى اجاوب عليه .. هو فى حاجه بين راجل ومراته مهما كانت تخاليها تعمل كده فيه .. ليه يا دنيا تعملى فيا كده ليه ده أنا ..
بتر كلمته وابتلعها قبل أن يكملها .. كان سيقول ده انا سترتك ومرضتش افضحك .. ولكن فروسيته المعهودة أبت ذلك …
ربت بلال على كتفه من الخلف ثم قال :
– أستنى يا فارس لما تقابلها وتتكلم معاها بهدوء شويه أحنا لسه مش عارفين حاجه أستنى لما تسمعلها الاول

ألتفت إليه فارس غاضباً وهو يقول :
– هتقولى ايه يا بلال هتقولى بلغت عنى وعن صحابى ليه .. ليه
ربت على كتفه مرة أخرى وهو يدعوه للهدوء مرة أخرى وأن ينتظر حتى يسمع منها
حتى هدأ فارس بعض الشىء وصمت غضبه خارجياً ولكن قلبه كان مشتعلاً .. كيف تفعل فيه ذلك بعد كل ما فعله من أجلها …

**************************************

أقتربت سيارة الدكتور حمدى من منزل بلال الذى شعر بنشوة وأنتشاء حينما لاح جانب المنزل من بعيد فقال سريعاً :
– كفايه هنا يا دكتور معلش تعبناك معانا
أبتسم الدكتور حمدى بوقار حيث قال :
– تعب ايه بس هو أنا اللى اعلقت …
قال كلمته وضحك بينما أنفجر بلال ضاحكاً ثم قال :
– بعد اللى شوفته فى المعتقل ده بيتهيألى مفيش مصرى متعلقش

ضحكا هما الاثنان بينما كان فارس واجماً شارداً فى عالمه الخاص … ترجل بلال من السياره وأنحنى بأتجاه فارس وضع يده على كتفه قائلا :
– الهدوء هو اللى هيعرفك السبب مش الغضب أهدى وتوكل على الله

أومأ له فارس برأسه بينما شرع الدكتور حمدى فى الانظلاق بالسيارة إلى حيث منزل فارس
صعد بلال درج منزله بهدوء ومر بجوار باب المركز الخاص به ونظر نظرةً فى الخفاء متعجباً ..
المركز خاوى ولكنه مفتوح وكأنه يعمل وكأنه لم يُغلق يوماً وفى هذه اللحظة شعر بمن يضع يده على كتفه من الخلف قائلا بخشونه :
– مين حضرتك