مع وقف التنفيذ بقلم دعاء عبد الرحمن ج3
جلس عمرو على طرف فراشه مشدوهاً لما رأى فى تلك الايام أولا فى أمن الدوله وثانيا هنا فى السجن ..
وقال بغضب وعصبية موجهاً كلامه لفارس :
– وبعدين يا فارس هنفضل كده لحد امتى حتى منعرفش تهمتنا ايه
جلس أحد الرجال على السرير بجواره قائلا:
– لا لازم تهدى وطى صوتك اللى بيعلى صوته هنا بيتسحب على عنبر التأديب
ألتفت عمرو إليه وحدق به قائلا :
– ايه عنبر التأديب ده كمان
أبتسم الرجل وقال :
– اه معلش كان المفروض أشرحلكم من الاول .. النظام هنا … السجن متقسم كذا عنبر ..عنبر التأديب وده متقسم زنازين صغيره مترين فى مترين وده بيبقى أنفرادى ..
وعنبر الجنائى ودول بقى تجار المخدرات وقتالين القتله وغيرهم وعنبر التخابر وده بقى مخصص للجواسيس وده بقى أنضف عنبر هو وعنبر القضاة وافراد الشرطه اللى بيجى هنا متهم فى قض..ية رشوة ولا فساد والمعامله فيهم معامله خمس نجوم ..
وهنا بقى العنبر السياسى وده كل اللى بيقول رأيه فى البلد دى ومعظمه مشايخ زى ما أنت شايف ..ابتسم بلال وهو يومىء براسه
وقال :
– ونسيت عنبر الاخوان
ضحك الرجل بصوت خفيض وقال ل بلال :
– اظاهر انك جيت هنا قبل كده يا شيخ
قال بلال بجمود :
– جيت مره واحده بس عرفت كتير
كتم عمرو غضبه وقال :
– برضه محدش جاوبنى هنفضل كتير ومن غير ما نعرف تهمتنا ايه ؟
ربت الرجل على كتفه قائلا :
– طالما محدش حقق معاكوا يبقى مفيش تهمه وبما أنكوا جايين دلوقتى يبقى انتوا مش معتقلين رسميين
قال فارس بإقتضاب :
– يعنى أيه مش رسميين
تكفل بلال بالرد عليه قائلا :
– يعنى زي ما صاحبك قالك .. متوصى علينا
أقترب عمرو من فراش بلال وجلس على طرفه قائلا :
– مين اللى هيوصى علينا يتعمل فينا كده مين
قال بلال وهو ينظر أمامه بشرود :
– مش عارف يا عمرو بس الموضوع ده شكله هيطول ولازم نحاول نهدى علشان نعرف نفكر..
قال كلمته الاخيره ثم نهض قائلا:
– تعالوا نصلى على الأخ اللى مات ده
قال الرجل الذى يحدثهم :
– هيجوا يخدوا جثته الفجر مع انهم عارفين ان فى واحد ميت هنا من بعد العشاء
**************************************
– ميرسى يا فندم .. نطقت دنيا بهذه العبارة وهى تتناول الشيك من والد هانى المتهم فى قض..ية القتل
وبرقت عينيها وهى تنظر للمبلغ المدون فيه وقالت بابتسامة :
– حضرتك أطمن خالص أبنك هيبقى فى حضنك قريب جدا
قال الرجل بلهفة :
– يارب يا استاذه ربنا يسمع منك … ثم قال بتسائل :
– هو الدكتور فارس مجاش النهارده ولا ايه
قالت بتمساك:
– الدكتور فارس مش بيجى كل يوم ولما بيكون مش موجود انا ببقى مكانه
