مع وقف التنفيذ بقلم دعاء عبد الرحمن ج3
********************************************
عادت دنيا إلى بيت والدتها وأول ما فعلت أجرت أتصالاً هاتفيا بباسم الذى اجابها فى سئم شديد :
– أيوا يا دنيا خير ؟
قالت فى سرعة :
– عاوزه أطمن عليه وأطمن أمه
زفر فى ضيق وقال حانقاً :
– هو طلع رحلة يا دنيا وعاوزة تطمنى عليه ..أنتى عارفه كويس هو فين ولا ناسيه
هتفت بغضب :
– أمه هتموت نفسها عليه حرام عليك
صاح غاضباً :
– هتعمليلى فيها حنينه ياختى ولا أيه ولا تكونى ناسيه أنك أنتى اللى بلغتى عنه ياام قلب حنين
تحشرج صوتها وقالت ببكاء :
– عارفه أنى أنا اللى أتزفت وبلغت بس عاوزه أطمن أمه وأطمن أنا كمان أنت وعدتنى محدش هيأذيه
رفع حاجبيه مندهشاً من كلامها الذى هو عكس تصرفاتها تماماً وقال ساخراً:
– والله أنتى لُغز يا دنيا طب لما أنتى قلبك عليه كده وافقتى ليه من الاول
هتفت باكية :
– علشان هو اللى اضطرنى لكده بغباءه ومثاليته الزايدة فاكر نفسه عايش فى الجنه
صمت باسم قليلاً ثم قال بهدوء حاسم :
– بصى يا دنيا أنا هتكلم فى الموضوع ده لاخر مرة علشان زهقت منه ومش عاوز وجع دماغ تانى …
فارس هيفضل فى المعتقل لحد ما القض..يه تتقفل وتخلص خالص يعنى اربع خمس شهور بالكتير
وصلى الكلام ده لاهله بطريقتك المهم متوجعليش دماغى تانى فاهمه
أبتلعت ريقها بصعوبه وهى تحاول تنظيم أنفاسها وهى تمسح دموعها بتوتر وقالت :
– طب وهنعمل ايه فى القض..ية
رفع حاجبية متهكماً وقال :
– ايوا هو ده المهم دلوقتى كده أنتى دنيا اللى أنا أعرفها …ركزى معايا كده وفتحى مخك …
أستمعت إليه بإهتمام وتركيز وهو يقول :
– أولا مفيش مخلوق فى المكتب عندكوا هيعرف بحكاية الاعتقال دى ولا حتى الدكتور حمدى وكويس أن نورا اجازه
علشان هى اللى هتعمل قلق ومكنتش هتسكت دلوقتى انتى المسؤله عن كل حاجه فى المكتب وده فى صالحنا
علشان كده عاوزك اول حاجه تعمليها أول ما تروحى المكتب النهارده … تكلمى الراجل صاحب القض..يه وتبلغيه ان فارس طالب نص الاتعاب
على الاقل دلوقتى وبعد ما توصلك الفلوس هقولك الخطوه اللى بعدها
قالت معترضة :
– لاء لازم أعرف كل حاجه دلوقتى
زفر بقوة قم قال بملل :
– هقولك ..أنا خلاص وصلت لسكرتير النيابة اللى هيسحبلنا الورقه المطلوبه من ملف القض..ية قبل ما تروح على المحكمة وهتفاوض معاه النهارده على المبلغ اللى هياخده … ومش كده وبس ..أنا كمان وصلت لشهود الاثبات وبرضه هتفاوض معاهم على المبلغ ..
والفلوس اللى هتاخديها من الراجل فى اقرب وقت هنكيشهم منها .. وكده لا هيبقى فيه دليل ولا شهود والحادثة هتبقى قضاء وقدر ومش مقصودة والواد يطلع من عقوبة القتل العمد وبعد كده ممكن نفاوض أهل القتيله لما يبقوا فى موقف الضعيف
وممكن ساعتها يتنازلوا بقرشين وتبقى القض..يه بخ.. فهمتى
