مع وقف التنفيذ بقلم دعاء عبد الرحمن ج3

ضحك وهو يمسك يدها التى ضربته بها وقبلها ثم قال :
– هو أنا معرفش أهزر معاكى شويه يا حجه علطول فقسانى كده
ابتسمت فى سعادة وقالت :
– تحب احددلك معاد أمتى
أخرج هاتفه من جيبه ووضعه امامه على المائدة قائلا:
– دلوقتى

نظرت إلى الهاتف ثم نظرت إليه بدهشة وقالت :
– أنت بتكلم جد يا واد

أخذ الهاتف وضغط رقم منزلها وأعطاها الهاتف وهو يومىء براسه :
أخذت الهاتف مبتسمة بدهشة من تصرفاته الصبيانية وكأنها ترى ولدها لأول مرة ….

نظرت أم يحيى الى مُهرة التى كانت تفرك يديها بتوتر بالغ وقد أحمرت وجنتيها بشدة بعد أن أخبرتها بطلب فارس وقالت لها :
– يعنى مردتيش عليا يا مُهرة ولا أوعى تكونى مستغربة زيى انا وابوكى
لم تستطع أن ترفع وجهها كان الخبر كفيل بأن يفقدها وعيها ويلجم لسانها .. ها هو حبيب العمر يتقدم طالباً الزواج منها ثانى يوم تحرره من الاسر وكأنه لم يكن فى أسر السجون فقط ..

هزتها أمها من كتفها وهى تقول :
– يابنتى ردى على أبوكى
رفعت مُهرة رأسها الى والدها الذى قال :
– هتعملى فيها مكسوفه ما تردى على طول ها اقوله ايه موافقه ولا رافضه
همهمت فى خفوت فلم يسمعها أحد منهما …هتف والدها بصوت عالى أنتفضت له وهو يقول :
– متعلى صوتك
جلست والدتها بجوارها وهى تقول :
– حبيبتى المرا دى مش هنجبرك على حاجه أنتى حره متخافيش أنا عارفه أنه أكبر منك بعشر سنين وأنتى بتعتبريه زى أخوكى الكبير و……..
قاطعتها مُهرة فجأة وهى تقول بسرعة :
– موافقة

***************************

– فارس أنت بتهزر ولا بتكلم جد
ضحك فارس وهو يجيب عمرو عبر الهاتف النقال ثم قال :
– هى الحاجات دى فيها هزار يا عبيط أخواتك أنت .. لاء طبعاً مبهزرش
قال عمرو بمرح :
– أصل مش معقول .. أنت عارف أنت أكبر منها بكام سنه ولا ناسى .طب وهى وافقت ازاى

تنحنح فارس وهو يقول :
– ايوا عارف انا أكبر منها بعشر سنين وايه المشكله يعنى شوف الرسول كان أكبر من السيدة عائشة بكام سنه ورغم كده كانت أحب زوجاته لقلبه وهى كمان كانت بتحبه جدا عليه الصلاة والسلام .. ده الرسول عليه الصلاة والسلام كان بيأخذ منها الاناء بعد ما تشرب ويدور على مكان موضع شفتيها ويشرب من نفس المكان شفت انت حب أكتر من كده

تنهد عمرو وقال :
– طب وهى قالتلك ايه وافقت على اساس ايه يعنى