مع وقف التنفيذ بقلم دعاء عبد الرحمن ج3

الفصل التاسع والعشرون
———————

صرخت دنيا فى وجه وائل وصاحت بعصبية شديدة :
– أنت بتستهبل يعنى أيه مش لاقيه هيكون راح فين اختفى يعنى…
تبادل معها الصراخ وأخذ يصيح بأنهيار :
– وأنا هستهبل ليه هو انا مش رايح معاكى فى نفس الداهية ولا ايه بقولك اختفى اختفى لا تليفون ولا مكتب ومعرفش بيته عاوزانى أعمل ايه اضرب الودع ولا افتح الكوتشينه
جلست ودفنت رأسها بين كفيها وهى تنوح وتبكى ثم تنهض وتدور حول نفسها فى المكان هائمةً على وجهها وهى تقول بهيستيرية :
– يعنى ايه .. وقعنا فى المصيبة دى وسابنا وخلع .. ده أحنا قدامنا أقل من شهر والتحقيقات تبدأ معانا وساعتها هنتحبس على ذمة التحقيق وياعالم هنطلع تانى ولا لاء .. ألتفتت إليه صارخه بجنون :
– ما ترد عليا يا بنى آدم هنعمل ايه
أتجه نحوها ودفعها من كتفها وهو يصيح :
– معرفش معرفش .. ياريتنى ما كنت سمعت كلامه ياريتنى ماكنت بصيت لفلوس القض..يه دى أدينى هتحبس معاكى ومستقبلى هيضيع

نظرت له بذهول وهى تقول غاضبة :
– طب ليه عمل كده ليه .. كان قصده ايه من كده ياخد الفلوس ويحبس فارس ويضيع مستقبلى ويحبسنى وخلاص طب ليه

ضرب وائل قبضته فى الجدار وهو يقول بخزى :
– هو انتى لوحدك .. منا كمان ضيعلى مستقبلى وهيحبسنى بسببه .. قالى مكلش دعوه أنا هوقف الظابط عند حده ومش هيروح المحكمه وطلع بيضحك علينا .. زى ما يكون كان قاصد يعمل فينا كده من الاول وكان بيلاعبنا بصوابعه زى عرايس الخشب ..يخلينا نروح نتفق مع سكرتير النيابه وندفعله الفلوس وهو بعيد ويخالينى اروح للظابط اساومه هو وهو الشهود وهو بعيد ضرب الجدار بقبضته مرة تلو مرة وهو يهتف حانقاً :
– غبى أنا غبى كان لازم أخد بالى

لمعت فكرة فجأة فى رأسها وهى تقول :
– لاء أنا مش هسمح بكده .. أنا هجدد جواز سفرى وهخرج بره مصر بأقصى سرعة مفيش وقت

ألتفت إليها وقد واتته نفس الفكرة ولكنه قال :
– وأنا بقى لو سافرت وهربت .. أسيب مراتى وعيالى لمين هنا
تقدمت نحو الباب وفتحته بعنف وهى تصرخ فيه :
– أطلع بره يا وش النحس أنت أطلع بره

خرج وهو ينظر إليها نظرات محتقرة بإزدراء فصفعت الباب خلفه بقوة وأخذت تتنفس بصعوبة وهى تفرك يديها بتوتر وخوف وتدور حول نفسها ذهاباً وأياباً وهى تفكر فى كيفية انجاز جواز السفر سريعاً لتستطيع الهرب وفى خضم أفكارها المتلاطمة المتناثرة غفلت شىء مهم جدا وهو أنها لاتستطيع السفر دون أذن الزوج …