مع وقف التنفيذ بقلم دعاء عبد الرحمن ج3

وخرجت متوجهة لمكتبها فوضع صلاح يديه على كتف عمرو وقال :
– ربنا يخليلك مراتك يابنى

نظر له عمرو نظر مبهمة وأتجه إلى مكتب إلهام ..طرق الباب ودخل فقالت :
– اقفل الباب يا بشمهندس
أغلق عمرو الباب ووقف مكانه قائلا :
– خير يا بشمهندسه
أشارت له بالجلوس أمامها فأقترب قائلا:
– انا اصلى لسه هستلم الشغل من استاذ صلاح
قالت ببطء وهى تتفحصه :
– مش هعطلك كتير اتفضل

جلس عمرو على المقعد أمام المكتب متحاشيا النظر إليها ..مالت للأمام وأسندت ذقنها إلى راحتها وهى تنظر إليه مبتسمة
وقالت :
– تعرف أنك أحلويت فعلا بعد الجواز
نهض عمرو على الفور وقال بضيق:
– معلش أنا لازم أمشى عندى شغل كتير

نهضت من مقعدها ودارت حول مكتبها ووقفت امامه ..مدت يدها إليه ولمست بأناملها أزرار قميصه وقالت هامسة:
– أنت ليه مش حاسس بيه يا عمرو
نظر ليدها وابتعد خطوة للخلف ونظر فى الاتجاه الاخر وهو يقول بجدية:
– يا بشمهندسه اللى بيحصل ده مينفعش خالص

أقتربت هى الخطوة التى أبتعدها ونظرت إليه برجاء وقالت بضعف:
– مينفعش أيه ..مينفعش أحبك
نظر إليها بدهشة وقال :
– يا مدام إلهام انا راجل متجوز وبحب مراتى وحضرتك كمان متجوزة و..
قاطعته بسرعه وهى تتلمس قميصه مرة أخرى وقالت بعينين ملتهبتين :
– وبحبك أنت ..

أشاح بوجهه وهو يبتعد عن يدها فقالت تستعطفه:
– يا عمرو أنا بحبك ومش عاوزه منك أى حاجه… أنت ليه مش قادر تحس بالى جوايا

شعر بالحرج والاضطراب وحاول أن ينتقى عبارات غير جارحه وهو يسمع نبرتها الواهنه التى ترجوه بها ..ألتفت إليها
قائلا بهدوء:
– يا بشمهندسه أحنا كلنا هنا بنحترمك وبنقدرك لكن غير كده مش هينفع صدقينى أنا محبتش ومش هحب حد غير مراتى .. عن أذنك

وتركها وأنصرف وهى ترمقه وتراقب حركته العصبيه وهو يفتح الباب ويخرج ويغلقه خلفه مسرعاً …
فرت دمعة من عينيها فمسحتها بسرعة وهى تقول بأبتسامه :
– غلطان يا عمرو .. معلش اصلك لسه متعرفنيش

توجه عمرو مباشرة إلى مكتبه وعانق زميله احمد بحرارة والذى بادله وداً بود …
والتفت إلى زميله نادر متناسياً المشاحنه التى كانت بينهما
وقال:
– أزيك يا بشمهندس نادر
نظر له نادر نظرة متعاليه وقال:
– كويس
ربت أحمد على كتفه وقال بمرح :
– واحشنى والله يا عمرو ووحشانى خفة دمك ..ايه خلاص هترجعلنا تانى ولا ايه
قال عمرو وهو يجلس خلف مكتبه بخفه :
– اه ان شاء الله ..هرجع أرخم عليكوا تانى