مع وقف التنفيذ بقلم دعاء عبد الرحمن ج3

أومأ الرجل برأسه متفهماً وقال :
– المهم عندى أنه هو اللى يشتغل القض..ية بنفسه
رفعت حاجبيها بدهشة مصطنعة وهى تقول :
– طبعاً يا فندم القضايا اللى زى دى الدكتور فارس هو اللى بيكتب فيها المذكرات وهو اللى بيترافع
واحنا بس بنعمل الشغل الادارى والمالى بتاعها يعنى حضرتك هتشوفوا فى المحكمه ان شاء الله ..
بعد قليل أنصرف الرجل ودخل خلفه وائل مسرعا ً وقال بعينين لامعتين :
– أداكى الشيك

ابتسمت بثقة وهى ترفع الشيك امام عينيه ثم وضعته فى حقيبتها قائلة بقلق :
– أهى الفلوس بقت معانا أهى والراجل جاب الاتعاب كلها مش نصها زى ما كنا فاكرين عاوز ابنه بأى طريقة يارب بقى باسم يخلصنا من القض..ية دى بسرعة بقى انا قلقانه اوى

قال وائل مشجعاً :
– متقلقيش يا استاذه انتى قدها وقدود والاستاذ باسم خلاص ظبط الناس مش ناقص غير الفلوس علشان ينفذوا
ربتت على حقيبتها وهى تقول :
– وأهى الفلوس أهى يلا بقى كلمه وخليه يخلصنا

تحدث وائل هاتفياً مع باسم وأخبره أن المال قد اصبح بحوزة دنيا .. مد وائل يده بالهاتف الى دنيا قائلا:
– الاستاذ عاوز يكلمك
تناولت الهاتف وقالت بتعالى :
– أيوا

ابتسم باسم عندما لاحظ نبرة صوتها المتعاليه وقال بسخرية :
– طب حتى استنى لما تصرفى الشيك وبعدين ابقى اتغرى براحتك
مطت شفتيها بضيق وقالت :
– خير يا أستاذ باسم
– بكرة هنروح نصرف الشيك سوا ونطلع على طول على سكرتير النيابة نكيشه ونخلص معاه وبعدين نقعد مع بعض ونقسم الاتعاب علينا زى ما أتفقنا ماشى ..

قالت بإقتضاب :
– بس هنقعد فى مكان عام مش عندك فى المكتب
أطلق ضحكة عاليه أشعرتها بالاشمئزاز وقال بخبث :
– ايه موحشتكيش ولا ايه

أتسعت عينيها وشعرت انها ستتقيأ عندما ذكرها بما حدث سابقاً ..
أغلقت الهاتف فى وجهه وهى تتمتم :
– حيوان

**********************************

وقف صلاح ينظر الى إلهام التى كانت تتحدث فى الهاتف بلهفة وهى تقول لمحدثها :
– طبعاً يا باشا من رجالتنا ومينفعش نسيبه كده دى حتى تبقى وحشه فى حقنا وبعدين اللى موصى عليه ده مش أكبر من معاليك
صمتت بعض الوقت تستمع إليه ثم قالت بثقة :
– يافندم ارهاب ايه عمرو ده راجل روش سينيمات ومسارح يافندم دى رنة التليفون بتاعة عشره بلدى
صمتت قليلا مرة ثم قالت وهى تنقر على سطح مكتبها بأطراف أصابعها بعصبية ..
– ماشى يا فندم اللى تشوفه ساعتك المهم بس ميطولش كتير..
أغلقت الهاتف وزادت عصبية نقرها على المكتب فقال صلاح متلهفاً:
– ها يابشمهندسة ايه الاخبار