مع وقف التنفيذ بقلم دعاء عبد الرحمن ج3

نظرت فى عينينه تكاد أن تخترقهما وتتسلل الى عقله لتعرف فيما يفكر وماذا سيقرر
وقالت وبلا مبالاة:
– مش جايز فعلا كده
مط شفتيه وهو يقول :
– كله هيتحدد لما اروح اقابل المتهم ثم لمعت عينيه وهو ينظر امامه قائلا :
– انا هقدر اعرف منه هو عمل كده فعلا ولا لاء

قالت بشك :
– وهو يعنى هيعترفلك
أعاد رأسه الى الاوراق مرة اخرى وهو ينهى الحديث قائلا :
– سيبيها على الله

************************************

كانت عزة تحضر الطعام بسرعة وتضعه فى الاطباق وتنقلها على الطاولة ضاحكةً وهى ترى عمرو يلكم الوسادة بقوة مرات متتالية
فتسقط الوسادة على الارض فيأخذها ويلكمها مرات أخرى ثم يخنقها بيديه بعنف وقد تصبب عرقاً
فقالت وهى تجلس حول الطاولة بجواره :
– نفسى أعرف بتعمل ايه

ألتفت إليها وهو يمسح العرق عن جبينه وقال وهو يلهث :
– بتمرن عندى ماتش ملاكمة
ضحكت مرة أخرى وقالت :
– أول مرة اعرف انهم بيخنقوا بعض فى الملاكمة
هز رأسه نفياً وهو يتناول الملعقة قائلا :
– لا ده مش علشان الملاكمه ده علشان لو واحد ضايقنى أخنقه وأخلص منه

وضعت كوب المياه أمامه ووهى تقول :
– وهتلاعب مين بقى تايسون
نظر لها بطرف عينيه مازحاً وهو يقول :
– بتقولى فيها انا فعلا هلاعب بلال تايسون
نظرت إليه بدهشة وقالت :
– أيه ده بجد والله ..هى دى مسابقه ولا ايه
وضع الطعام فى فمه وقال :
– لا يا بنتى مسابقة ايه اصلا بلال هو اللى بيمرنى انا وفارس فى مركز الشباب اللى جانبينا
اسندت ذقنها على يدها وهى تقول :
– أنا نفسى الاقى حاجه واحده الدكتور بلال مبيعرفش يعملها حتى الملاكمه هو اللى بيمرنكوا
ضربها على كتفها بخفة وهو يقول بحنق :
– ايه يا ماما مالك معجبة بيه كده ليه طب بكره هتشوفى هكسرهم هما الاتنين على حلبة المصارعه
نظرت له بدهشة وقالت :
– هى مصارعه ولا ملاكمة
وضع قطعة من اللحم فى فمها وهو يقول :
– كلى وانتى ساكته يا ذكيه هانم

صمتت قليلاً وهى تنظر له باضطراب ثم تشجعت وقالت :
– عمرو أنا لازم اروح لدكتوره علشان موضوع الحمل
وضع الملعقة فى طبقة ونظر لها معاتباً وقال :
– احنا مش أتكلمنا فى الموضوع ده قبل كده وقلنا نسيبه على ربنا

أسندت وجنتها على راحة يدها وقالت بحزن:
– أحنا متفقناش أنت اللى قررت وانا اضطريت اوافق انا مش عارفه انت ليه مش مهتم
أخذ كفها من تحت وجنتها ووضعه بين راحتيه وقال بهدوء :
– بصراحه مش عاوز حاجه تشغلك عنى وعن اهتمامك بيا لوحدى
ومدام التأخير جاى من عند ربنا لوحده يبقى خلاص …