مع وقف التنفيذ بقلم دعاء عبد الرحمن ج3

نظرت والدته إلى الهاتف ثم نظرت إليه متسائلة :
– جايبلها تليفون ليه
قال بحرج :
– يعنى حبيت ارفع روحها المعنويه شويه يعنى علشان كانت تعبانه ومضايقه أكيد هتفرح بيه ..ثم تابع بارتباك :
– مش كده برضه وانا غلطان
أخذت منه الهاتف وأومأت برأسها وقالت ببطء:
– بعد الشر عنك من الغلط يابنى خلاص انا هديهولها أنا كده ولا كده طالعالهم دلوقتى
أدخل أنت ارتاح مع عروستك بس ..بس انا هقولها أنه هديه منى أنا أتفقنا
ابتسم وقال بأحراج :
– مش هتفرق يا ماما أنا وأنتى واحد المهم انها تتبسط وتخرج من حالتها دى شويه

********************************

نظرت مُهره إلى الهاتف فى يديها وتأملته قليلاً ثم اعادته أمام ام فارس قائلة :
– أنا آسفه يا طنط بس أنا مش عاوزه حاجه
هتفت والدتها معاتبةً:
– ليه يابنتى ده هدية من خالتك أم فارس حد يرد الهديه

ربتت أم فارس على يدها بإشفاق وكأنها قرأت فى عينيها وهى تتفحصه أنها علمت من الذى أحضره لها وقالت بهدوء:
– أنا كنت فاكراكى هتفرحى بيه كده برضه ترفضتى هديتى
نظرت لها مُهره نظرة طويلة وقالت بشرود :
– عمرى ما رفضت هديه من …من حضرتك وطول عمرى بفرح بالهدايا بس دلوقتى خلاص مبقتش تفرق معايا كتير
أقتربت منها أم فارس وأحاطت كتفها بذراعها وربتت على يدها الاخرى وقبلتها على وجنتها وقالت بتعاطف:
– تصدقى انك كبرتى فعلا ..بس لو ليا غلاوة عندك خديه
ثم همست فى اذنها:
– يا عبيطه بقولك ده هديتى انا ..ولا أنا بقى خلاص راحت عليا مبقتش ليا غلاوه فى قلبك

قفزت دمعة من عينها فمسحتها سريعاً وهى تقول :
– متقوليش كده يا طنط ده أنتى اللى مربيانى
وضعته أم فارس فى يدها وهى تضغط على يدها برفق قائلة :
– خلاص يبقى تاخديه من سكات
قبضت عليه فى يدها وهى تقول :
– متشكره أوى يا طنط ربنا يخليكى ليا
ابتسمت أمها بينما قبلتها ام فارس ثانية وقالت متسائلة :
– أخبار المذاكره ايه بتذاكرى ولا بتطنشى
نظرت مُهرة امامها وقالت بجدية :
– بذاكر وهفضل اذاكر طول عمرى يا طنط لحد ما ابقى حاجه كبيره اوى انا دلوقتى ميهمنيش غير مستقبلى وبس هو ده اللى هينفعنى مش اى حاجه تانيه …

عزمت على نسيان ماضيها وحاولت أن تقتلعه من حياتها ولا تفكر سوى فى مستقبلها وفقط ولكن هذه هى طريقة تفكير الحالمون فقط …فالحالمون فقط هم من يعتقدون أن الانسان من الممكن ان ينفصل عن ماضيه وظروفه و بيئته التى كونت شخصيته واصبحت جزء من تكوينه وبنيانه بل اصبحت جزء لا يتجزأ من حاضره ومستقبله ايضاً …