مع وقف التنفيذ بقلم دعاء عبد الرحمن ج3

هتفت الهام مقاطعة:
– عمرو أنت شكلك اعصابك تعبانه خد أجازة ارتاح شويه

هز رأسه نفيا وقال بتصميم :
-اسف يا مدام أنا مصمم على الاستقاله ..

لمعت عينيها بالدموع وهى تحاول الوصول لنقطة اتفاق قائلة :
– طب اسمع بس يا عمرو خاليك فى الشركه وانا اوعدك انى مش هتكلم معاك تانى كلام يضايقك أو يحسسك أنك بتعمل حاجه غلط
نظر لها بترقب وهو يقول :
– مقدرش .. مينفعش أحط نفسى فى الفتنه وأقول انا جدع وقدها وقدود
ابتلعت ريقها وقالت بتماسك :
– طب يا عمرو لو فى شغل بعيد عنى تقبله ؟

قال بشك :
– شغل ايه
ابتسمت بتوتر وهى تقول :
– شركتنا داخله شراكه مع شركة سياحة هنبنى فندق سياحى فى مكان جديد اسمه وادى الريان
هنبقى أول فندق فى المكان ده ..المشروع ده ضخم ياعمرو وهيطلعلك منه مكفأة حلوه اوى
ممكن تبدأ بيها حياتك العمليه وتفتح شركة هندسة صغيره كده على قدك … ها قلت ايه
صمت قليلاً يفكر فى الامر فقالت :
– متقلقش مش هتبعد عن بيتك كتير هتنزل أجازه يومين فى الاسبوع تلات شهور والمشروع يخلص مش كتير يعنى بالنسبة لشغلك

نظر إليها بتسائل وقال :
– وأشمعنى أنا اللى عاوزانى اشتغل المشروع ده .. ليه مدتيهوش لنادر ولا حد تانى غيرى

عقدت ذراعيها وقالت بخفوت :
– مش هينفع اجاوبك علشان وعدتك انى مش هقولك كلام يحسسك انك بتعمل حاجه غلط ها فهمت ولا اقول بصراحه ؟

صمت قليلاً يفكر ..وجدها فرصة من الممكن يبدأ بها حياته بعيدا عنها وعن فتنتها وستضمن له مستقبل جيد بالحلال
وأخيرا خرج عن صمته قائلا :
– موافق … بس محتاج شوية وقت علشان عاوز اتابع موضوع صحابى اللى حضرتك مهتمتيش بأمرهم
ابتسمت وقالت بثقة :
– متقلقش هيخرجوا قريب .. اللى خرجوك هيخرجوهم ..هما بس معرفوش يطلعوهم معاك بسرعه علشان واحد فيهم متوصى عليه جامد والتانى أُعتقل قبل كده ..استدار عمرو بإنفعال قائلا :
– معرفتيش مين اللى وصى عليه بالطريقة دى
تناولت خصلة من شعرها تلفها حول اصبعها وقالت بإستغراب :
– الحقيقة عرفت بس مستغربه اوى

قالت كلمتها الاخيرة ثم توجهت لمكتبها وجلست خلفه وهى تنظر اليه بتأمل وهو
يقول متلهفاً :
– مين .. مين اللى عمل كده

مطت شفتاها وهى تقول ببطء :
– مراته
توجه نحوها واتكأ على المكتب بقبضتيه وهو يقول منفعلاً :
– مرات مين
رفعت حاجبيها وقالت :
– مرات صاحبك المحامى ده
أتسعت عينيه وهو يردد بذهول :
– دنيا