مع وقف التنفيذ بقلم دعاء عبد الرحمن ج3
قالت أم فارس لوعة :
– ماهى قالتلنا انه تعبان وسافر يتعالج
نظر عمرو امامه بإشمئزاز وهو يقول :
– مش لازم نصدقها فى أى كلمه قالتها ..
أنا هدور عليه بنفسى لحد ما الاقيه وبعدين ده اخو صاحبة الشركة اللى انا شغال فيها يعنى سهل أوصله ……..
*****************************************
عاوزه أيه يا نورا أنا مش فايقالك … قالت دنيا عبارتها تلك وهى تستند إلى ظهر مقعدها فى تأفف شديد
بينما نظرت لها نورا بإستنكار وهى تقول :
– أنتى بتكلمينى كده ليه يا دنيا هو انا جايه اشحت منك وبعدين متنسيش أنى مديرة المكتب يعنى اسلوبك لازم يكون أحسن من كده معايا
ضربت دنيا سطح المكتب بعصبية وقالت بعصبية :
– مديرة على نفسك .. أنا يا ماما أبقى مرات فارس ودراعه اليمين هنا فى غيابه عارفه كده ولا لاء
عقدت نورا ذراعيها بتحدى قائلة :
– الدكتور فارس مدانيش تعليمات بكده ولو حضرتك عاوزه تقعدى فى المكتب ده مكانه يبقى لازم هو اللى يقولى كده فى الاول
زفرت دنيا بقوة وقالت بتعالى :
– قولتلك مسافر مسافر أنتى ايه مبتفهميش
خرجت نورا مباشرة وهى صفعت الباب خلفها بقوة ودخلت مكتبها ..
جلست خلفه بإنفعال وهى تضرب بأناملها بسرعه وتوتر وهى تمتم:
– أنا مش مستريحه أبدا للموضوع ده .. لازم الدكتور حمدى ياخد خبر
***************************************
بعد خروج نورا مباشرة من حجرة فارس التى أحتلتها دنيا زفرت بضيق وغضب ولملمت أوراقها الخاصه لتنصرف ولكن رنين هاتفها أستوقفها وجعلها تنظر إلى الرقم الغير مسجل لديها بتفكير ولكنها قررت أن تجيب المتصل
وقالت :
– مين
أجابها المتصل ببرود :
– أنا حسن يا أستاذه دنيا
عقد ما بين حاجبيها وهى تقول :
– حسن مين
أجابها بنفس البرود :
– انا حسن اللى كنت شغال فى مكتب الدكتور حمدى معاكوا وبعدين روحت اشتغلت مع الاستاذ باسم
أومأت برأسها وقد تذكرته وقالت :
– خير يا حسن فى حاجه
– خير يا استاذه كل الحكايه أنى عاوز سلفيه صغير منك حوالى نص مليون جنيه بس
أتسعت عينيها وهتفت ساخره :
– أنت بتكلمنى علشان تهزر معايا ولا أيه
– أنا مبهزرش معاكى ولا حاجه انا بتكلم جد ودخلت فى الموضوع دوغرى
عقدت حاجبيها بشدة وقد شعرت بالخوف وقالت :
– أتكلم على طول
– زى ما قلتلك كده نص مليون
قالت بجمود :
– مقابل أيه
– مقابل اللى سمعته بيحصل بينك وبين الاستاذ باسم يوم ما جيتيله المكتب بالليل لوحدك وخرجتى متبهدله من عنده ومقابل أنك أتفقتى معاه إنك تودى جوزك فى داهيه علشان تقسموا انتوا الاتعاب سوا وتهبروا الملاين لوحدكوا.. ها كده كفايه ؟
