روح وريحان بقلم ايناس عادل ج ٣

ضحكت ثم تكلمت بكل ما يخص “طارق” .. ثم سكتت وانتظرت رده .. في حديثها حاولت بقدر الإمكان ألا تدين “طارق” ..

سمع وهو يشعر بندم أن تركها كل هذا الوقت دون أن يطمئن عليها .. دون أن يسمعها ويفتح معها حواراتهما السابقة ..
بعد ان انتهت حاول التبسم قائلا :
– انا محتاج قهوة وبلكونة .. ايه رأيك نقوم نعمل قهوة ونيجي نقعد قعدة من بتوع زمان ..

نظرت له قائلة :
– بس كدة .. مش هتعمل حاجة ..

ضحك قائلا :
– لا ما انا هجهز العصاية .. وانتي تعمليلي قهوة ..

حملقت فيه قائلة :
– بجد ..

رد قائلا :
– قومي يا ريم .. قومي ربنا يهديكي .. انا محتاج قهوة ..

حضرا القهوة ثم عادا ليجلسا في شرفته .. ظل يحتسي قهوته بشرود وهي تنظر له تنتظر حديثه .. بعد فترة نظر لها قائلا :
– اشربي قهوتك ..

احتست قهوتها وقلقها يزداد .. لماذا سكت .. أنهى قهوته ثم نظر لها قائلا :
– يعني انتي قابلتيه من 3 سنين .. وبعدين حلمتي بيه السنة دي .. وافتكرتي انك اول مرة تشوفيه في الحلم .. وبعدين شفتيه في الواقع .. وعرفتي اسمه ووظيفته وسنه كمان ما شاء الله لا ومتجوز ولا لا من نفسك .. وبعدين شفتيه كتير مش عارفة ازاي .. وبعدين لقيتي نفسك بتفكري فيه كتير .. فحسيتي انك كدة بتعملي حاجة غلط فجيتي قلتيلي .. صح ..

أومأت وهي تشعر بجفاف حلقها .. فاقترب منها قائلا :
– طيب بما انها قاعدة صراحة بقى .. تقوليلي كل حاجة .. يعني انتي فاكراني هيتضحك عليا بالكلمتين دول ..

زاغ بصرها وهي تسأل :
– كل حاجة ازاي ..

عاد للخلف وهو يقول :
– طيب انا هسأل وانتي تجاوبي .. هو اللي كلمك وقالك البطاقة الشخصية بتاعته ..

ابتلعت ريقها وهي تقول :
– اه .. بس انا مردتش عليه .. وكمان هو مضايقنيش ومعمليش حاجة .. يعني قالي كدة وبس ..

قال :
– ماشي هعديها .. ولما بقيتي بتشوفيه كتير .. مش عارفة ازاي بردو ولا هو اللي كان بيجي يشوفك ..

توترت وهي تجيب :
– والله يا باسل انا كنت بشوفه واقف بعيد بس .. ولا مرة حاول يكلمني لما كنت لوحدي .. بس لما بقت معايا ريحانة .. جه كلمنا الاسبوع اللي فات بس .. حتى ريحانة هي اللي ردت عليه ومديتوش فرصة يقول حاجة .. هو بس قال انه عاوز يقولي حاجة قبل ما ييجي يتقدم لي .. بس مقالش ..

تنهد “باسل” ثم رفع رأسه ينظر للسماء .. وبعد برهة قال :
– ومتقدمش ..