روح وريحان بقلم ايناس عادل ج ٣

قالت “ريحانة” وهي تمسح دموعها :
– مين اللي قالك كدة

شهقت “روح” قائلة :
– هو معدش بيلعب معايا .. ومش بيفسحني يوم الجمعة .. ومش بيرضى يكلمني خالص .. وكل شوية يقول تعبان من الشغل .. شغل شغل شغل ..

ابتسمت “ريحانة” وهي تضمها لها قائلة :
– لا طبعا ايه الشغل الوحش دة .. طيب حقك عليا انا .. انا هخليه يصالحك ويعتذر لك كمان ..

ثم ابتعدت عنها قائلة :
– ثواني بس اخلي الباص يمشي .. وتيجي معايا انا وريم ..

ذهبت لتخبر السائق بالذهاب ثم عادت لـ”روح” قائلة :
– دلوقتي هتيجي معايا انا وعمتو .. وبعد المدرسة نروح مع بعض المكان اللي تحبيه اتفقنا ..

أومأت “روح” برأسها .. ثم جاءت “ريم” فقالت :
– ايه دة انتي لسة هنا ليه ..

ردت “ريحانة” :
– هتيجي معانا .. عندك اعتراض ولا ايه …

ابتسمت “ريم” لتقول :
– اعتراض .. وانا اقدر .. دة انا عربيتي هتتشرف بوجود حبيبة عمتو ..

في السيارة .. كانت “ريم” تقول :
– ريحانة قلت لك هوصلك الاول يعني هوصلك الاول ..

قالت “ريحانة” باستنكار :
– وليه يا بنتي .. انا خلاص اتعودت على مواصلتين ..

قالت “ريم” بإصرار :
– لا .. انا متعودتش اتعبك معايا كدة .. ميهونش عليا كل يوم اخليكي تيجي معايا للمدرسة وبعدين ..

ثم سكتت عندما لاحظت وجود “روح” التي لا تخفي شيئا عن والدها .. وكذلك قصدت “ريحانة” إسكاتها فقالت :
– انا لازم اجي معاكي المدرسة طبعا علشان اوصل روح حبيبتي بنفسي ..

ردت “ريم” بضيق :
– يا ريحانة السبب اللي كنا بنعمل كدة علشانه خلاص اختفى بقاله كم يوم .. وانا مرتاحة جدا الحمد لله ..

سألت “ريحانة” لتتأكد مم تفكر فيه :
– يوسف كلمك ..

ردت “ريم” بغضب :
– اه كلمني امبارح .. وصوته تعبان جدا .. ومش عاوز يقولي ماله .. وخفت اسأل رنيم يكونوا متخانقين ومش عاوزة تقول .. فسكت اعمل ايه يعني ..

تنهدت “ريحانة” وهي تقول :
– متكلمتيش مع باسل ..

ردت “ريم” بغضب :
– اتكلم معاه ليه يعني .. واتكلم معاه في ايه .. وبعدين هو انا بلاقيه علشان اتكلم معاه ولا اعرف حتى ماله ..

سكتت “ريحانة” وهي تضم رأس “روح” لصدرها في المقعد الخلفي .. سكتت لأنها تأكدت من الشئ الذي يغضب “ريم” ..

أن يوليك أحد ما اهتماما خاصا .. ثم تعيش أنت على اهتمامه .. كأنه الهواء .. وفجأة يسحب هذا الشخص اهتمامه دون مقدمات .. تشعر حينها باختناق وضيق .. كأن الهواء يسحب من رئتيك سحبا .. ولكن هل ستلومه .. أم تلوم نفسك أنك اتخذت الهواء من أناس زائلين .. وعلقت حياتك وآمالك على اهتماماتهم .. ستلومهم ولهم عذرهم على ما فعلوه .. أم تلوم نفسك التي ليس لها عذر في تعلقها ..