روح وريحان بقلم ايناس عادل ج ٣

ثم أكملت بألم :
– وتفتكر انت المفروض اجاوب اقولك ايه .. تفتكر اني ممكن افكر كأي بنت بقلبها .. طيب دلوقتي انت موتت اي شعور جوايا بأي حاجة .. يعني محستش احساس اي بنت في اي حاجة بيننا لانها كلها كانت بدون ارادتي ..

يبقى افكر بالعقل .. اوك .. هعقل وافكر بعقلي .. المفروض افتكر اي حاجة حلوة بيننا تخليني متمسكة بيك .. علشان اكون منصفة لازم اخد فرصة وافكر .. اممم بصراحة مش قادرة افتكر .. ممكن اكون نسيت ففكرني انت ..
طيب .. سكوتك معناه انك انت كمان مش قادر تفتكر .. يبقى النتيجة ان الخطأ كان مشترك بيننا .. بس هو انا في يوم يا يوسف عملت فيك اللي يخليك تعمل فيا كدة .. هل انا في يوم عطلتك عن شغلك او اتسببت ان مستواك يقل في شغلك .. هل كنت سبب انك تتعرض للوقف عن العمل .. واحتمال تتمنع من مزاولة المهنة ..

ثم انطلقت دموعها التي لم تستطع حبسها وهي تكمل :
– عارف يوم ما اتقدمت لي .. رغم انك حرمتني من حقي اني افرح .. بس كنت فرحانة .. وعمرها ما حصلت اني افرح لما حد يتقدملي .. واللي اتقدمولي كتير على فكرة بمناسبة الغرور يعني .. ورغم الكلام اللي قلتهولك في التليفون .. انا كنت موافقة .. وكتب الكتاب .. رغم الخطة اللي انت عملتها الا اني بردو فرحت وفرحت جدا كمان .. بس انت مهانش عليك تخليني افرح .. كنت فاكر لما تقولي الكلمتين دول هتهز ثقتي في نفسي .. لا على فكرة بقى مش كلامك اللي هيأثر فيا .. انا عارفة اني جميلة .. وجميلة جدا كمان .. مش هيفرق معايا رايك انت ..

عارف يا يوسف انا اتمنيتك اخ قبل ما اتمناك زوج .. بس عرفت ان مش كل حاجة بنتمناها بتكون خير لينا ..

بابا لما قالي على موضوع الطلاق انا رفضت ومتسألنيش عن السبب ..

وقف “يوسف” وجلس أمامها على فراشها .. في عمره كله لم يشعر بالندم كما يشعر به الآن .. مد يده ليمسح دمعها فأدارت وجهها .. بعد ما أصابها التوتر باقترابه .. فأمسك وجهها يلفه ناحيته .. ومسح دمعها وهو يقول :
– انا مسافر اسبوعين وهسيبك تفكري براحتك .. بس مش هقولك فكري في حاجة تشفع لي عندك .. ومش هقولك فكري بعقلك او بقلبك .. بس هقولك اني رغم كل اللي عملته فيكي .. فانا كنت ومازلت وهفضل احبك .. ومش هقدر اسيبك او اعيش من غيرك ..

ثم وقف يقبل رأسها قائلا :
– مع السلامة .. اشوفك بخير ان شاء الله ..