روح وريحان بقلم ايناس عادل ج ٣

سحبت يد “ريم” وهي تغادر .. ثم التفتت بعد خطوة لتقول :
– اه .. بما انك عارف ان عندنا جد .. وعارف اكيد عنوان بيتنا ساعة ما مشيت وراها قبل كدة .. فلو عاوز تكلمها ابقى تعالى كلمها هناك ..

ثم تركته وسحبت “ريم” خلفها حتى وصلتا لباب المدرسة فقالت :
– ريم انا خايفة .. قلبي بيدق جامد ووشي سخن .. ادخل معاكي المدرسة ولا ايه .. انا خايفة ارجع لوحدي يضربني …

ضحكت “ريم” التي هدأت بمجرد ابتعادها عنه قائلة :
– وانا اللي قاعدة اقول ريحانة اتبدلت .. ومن الصبح وانا قاعدة انبهر بيكي .. دلوقتي رجعت ريما لعادتها القديمة ..

ضربتها “ريحانة” قائلة :
– دلوقتي بتضحكي .. مش كنتي خرسة من شوية .. بجد انا مش عارفة انا كلمته كدة ازاي .. ممكن يعمل ايه ..

ردت “ريم” :
– طيب قوليلي انا اعمل ايه بعد اللي قاله دة ..

ابتسمت “ريحانة” لتجيب :
– بصي كلامه دة محتاج قاعدة وخصوصا بعد الحكاية اللي قالها دي .. انتي ازاي مفتكرتيهوش .. وقاعدة تقوليلي بحلم بحلم ..

قالت “ريم” :
– والله حلمت بيه ..

ردت “ريحانة” :
– خلاص ادخلي بقى .. عشان الحق اوصل شغلي في ميعادي .. وان شاء الله هستناكي علشان نعدي على رنيم ونتكلم هناك ..

أومأت “ريم” ودخلت للمدرسة .. بينما ذهبت “ريحانة” لتركب الحافلة .. وهي تتلفت حولها خوفا من “طارق” ..

———————-

في المدرسة .. حاولت “ريم” التركيز في عملها .. فعملها أمانة .. والأولاد الذين تعلمهم أمانة .. ليس لهم ذنب في مشكلاتها .. وخاصة أن اليوم ستختبرهم .. فعليها التركيز الشديد ..

دخلت فصلها وهي تحاول التبسم .. فهي عودتهم ذلك .. لا يجب أن تقطع عادتها تلك يوما .. ثم بعد حوارها اليومي معهم قالت :
– مستعدين للامتحان ولا لا ..

– مستعدين ..

أمسكت جهازها الإلكتروني في يدها قائلة :
– طيب كل واحد يمسك التابلت بتاعه يلا .. بمجرد ما تسمعوا الجرس الامتحان هيظهر قدامكم .. وانا هخرج .. وهسيبكم تمتحنوا .. الوقت هيكون قدامكم .. بمجرد ما ينتهي كل واحد هيضغط send في اخر الصفحة .. وطبعا انتو عارفين ان انا واثقة فيكم جدا .. وعارفة ان كل واحد هيحل لواحده .. وهتلتزموا بالوقت .. بمجرد ما ينتهي انا هرجع لكم .. والامتحان دة مجرد تقييم لنفسكم .. ربنا شايفكم .. عاوزاكم بقى تخلوا ربنا يشوفكم احسن ناس اتفقنا ..