روح وريحان بقلم ايناس عادل ج ٣

لم يتأخر “يوسف” وجاءها .. جلس على الأريكة في جانب غرفتها .. ثم وضع وجهه بين كفيه .. نظرت له ثم تنهدت بأسى .. عدلت من وضع “روح” التي ذهبت في سبات عميق .. ثم قامت لتجلس جواره .. ربتت على كتفه وهي تقول :
– لعله خير إن شاء الله .. اللي حصل حصل خلاص ..

نظر لها وهو يقول بغضب :
– هي السبب .. جننتني يا ريحانة جننتني .. انا مكنتش هعمل كدة .. بس هي اللي اضطرتني اعمل كدة ..

أمالت رأسها وهي تنظرله بنصف ابتسامة قائلة :
– هي اللي اضطرتك تعمل كدة بردو .. وجننتك ..

خرجت منه ابتسامة مغتصبة وهو يقول :
– مش عارف بقى .. بس ع الأقل مكنتش هتقدم لها بالشكل دة ..

اتسعت ابتسامتها وهي تقول :
– المهم انك اتقدمتلها .. بس عشان تكون عارف ومتتصدمش انت هتترفض .. بس مش عايزاك تستسلم .. اصبر شوية وحاول تاني ..

رغم ما يشعر به من ضيق إلا أنه ضحك بقوة وهو يقول :
– مين قالك اني هترفض .. انا اخدت الموافقة خلاص ..

نظرت له باندهاش قائلة :
– نعم .. ازاي ومن مين ..

ابتسم وهو يقول :
– انا اتقدمتلها من هنا واتوافق عليا من هنا ..

كانت تريد أن تسأله أستقبل بذلك ؟! .. ستتزوجها دون إرادتها .. ولكنها قالت :
– انا مش عارفة ازاي عمو احمد يوافق كدة مع انه عمره ما غصب رنيم على حاجة .. وكمان رنيم عمرها ماقعدت قعدة واحدة مع اي عريس من اللي اتقدمولها ..

قال ساخرا :
– مش يمكن لانه عمره ما غصبها على حاجة بقت كدة .. وبعدين جميلة الجميلات موافقتش على اي عريس ليه .. كانت بتدور سيادتها على الكمال ..

وجمت قائلة :
– ليه بتتكلم عنها كدة يا يوسف .. وايه جميلة الجميلات دي .. بصراحة انا مش عارفة انت ازاي عملت كدة .. يعني رنيم رفضت كل العرسان اللي اتقدمولها من غير ما تعرف عنهم حاجة .. هتوافق عليك ازاي وانتم بينكم السوابق دي كلها ..

ضحك قائلا :
– حلوة سوابق دي .. بس لما تتصلح هبقى اتكلم عنها كويس ..

أمسكت يده قائلة :
– طيب يا يوسف انا مش هتمنالك احسن من رنيم .. بس انا بوصيك عليها .. رنيم غالية عندي اوي .. اوعى تكسرها علشان تصلحها ..

نظر إلى يدها التي تمسك بيده راجية .. ثم نظر لعينيها ليتلقى نظرة لم يفهمها .. ثم ابتسم ليغير الموضوع قائلا :
– بقى يا بت انتي باسل يخليكي تتكلمي .. وانا افضل وراكي المدة دي كلها ولا تعبريني ..