روح وريحان بقلم ايناس عادل ج ٣

مزعجة “ريحانة” تلك .. حتى يوم رآها قبل في النادي .. كانت هي من وترته وهو يحاول إنقاذ “ريم” .. كانت تبكي بشدة جعلته يتشتت .. على عكس “رنيم” كانت هادئة تحاول تهدئة “ريم” ..

لم يسمع صوت “ريم” في هذا اليوم أيضا .. فلشدة حرجها من وجود رجال حولها وضيقها كذلك .. كانت تتألم في صمت .. يومها جذبه لها شئ غريب لا يدري كنهه .. ولكن مر الأمر بسلام لأنه لم يراها بعدها ..

وأخيرا قرر سيتزوجها .. ولأنه تأخر في قراره .. فقد أتى ما يؤخره أكثر .. فقد كانت أمامه طيلة الفترة الماضية .. ولكن حين قرر جاءه ما يعيقه .. كما أعاق هو الأمر قبل ..

نفس الشئ الذي يعيقه عن كل شئ في حياته .. سيثور ويغضب ولكن لن تفيده ثورته ولا غضبه .. يثور وحده ويغضب وحده ..

دخلت “نور” لتجده يلملم أشياءه بسرعة غاضبة في حقيبة سفره .. لا تعرف كيف تمتص غضبه .. تخشى أن تفتح فمها فيثور عليها .. حتى لا مجال لديها لتمرح معه .. ماذا تفعل .. رفع رأسه وجدها واقفة .. تراجعت خوفا منه .. فسحب نفسا عميقا وهو يقول :
– تفتكري اعمل فيه ايه .. طيب دة ابويا .. تعرفي لولا انه هددني بميراث العنود مكنتش سافرت له ..

اقتربت منه قائلة :
– ماما قالتلك انها متنازلة عن ميراثها .. علشان خاطري متعملش في نفسك كدة ..

ثار قائلا :
– دة حقها ولازم تاخده .. هو عارف ان العنود نقطة ضعفي علشان كدة بيضغط عليا بيها .. كل شوية عاوزني اسافر له علشان اتعرف على مراته الجديدة مرة وعلشان اعلم مراته الجديدة الشغل مرة .. كأني العبد الحبشي اللي مأجرة لمرتاته ..

حاولت “نور” التبسم قائلة :
– هي دي مراته الكام .. التلاتين باين ..

ابتسم هو الآخر ليقول :
– والله ما عدت عارف له .. دة هيدخل موسوعة بعدد اللي اتجوزهم .. انا اهم انجاز عملته في حياتي اني طلقت امي منه ..

اقتربت منه لتقول :
– معلش انت عارف لانك الولد الوحيد بيحبك وبيعمل معاك كدة واخواتك كلهم بنات .. يعني لما يحتاج لحد هيروح للبنات ..

رد ساخرا :
– لا انا عارف انه بيحبني .. وواثق من دة جدا .. انا بس عاوزه يحب العشر بنات زي ما بيحبني ..

ضحكت قائلة :
– خالاتي العزيزات فكرتني بيهم .. كلهم زعلانين منك وبيقولولك هو عشان العنود الكبيرة تزورها هي وهما لا ..

ابتسم قائلا :
– لما ارجع من رحلة المرمطة دي ان شاء الله هزورهم .. المشكلة مش في زياراتهم .. المشكلة في زياراتهم وزيارات امهاتهم .. انا مش عارف بابا بيفتكرهم ازاي ..