روح وريحان بقلم ايناس عادل ج ٢

سأل :
– شكل قانوني ازاي ؟؟

أجابت :
– يعني لو حضرتك كتبت الكلام دة ومضيت عليه .. انا اقدم طلبك لرئيسي .. لو وافق اروحلها المستشفى ..

سأل :
– ولو موافقش ..

أجابت :
– هعرف اقنعه ..

قاطعها :
– تعرفي تقنعيه ازاي يعني ..

لماذا غضب ؟! .. تراجعت خطوة لتجيب :
– بالقانون برده هقنعه انه يوافق .. خصوصا ان حضرتك الدكتور المشرف على حالتها .. فهتكون اكتر واحد عارف ايه اللي يفيدها وايه اللي يضرها ..

هو نفسه لا يعرف لماذا غضب .. أومأ قائلا :
– مفيش مشكلة .. اكتب طلب ..

دخلت مكتبها وهي تقول :
– طيب انتظر دقيقة واحدة لو سمحت ..

دخلت لتجد “نهلة” منشغلة في عملها .. جلست أمامها قائلة :
– نهلة .. نهلة .. نهلة ..

رفعت “نهلة” رأسها قائلة :
– ايه .. ايه .. ايه .. هتبقي انتي وابني عليا .. عاوزة ايه ..

ابتسمت “رنيم” قائلة :
– دكتور يوسف برة .. وهيدخل دلوقتي ..

ردت “نهلة” :
– اه اشتغل محرم يعني ..

ضحكت “رنيم” قائلة :
– مش انا بشتغل معاكي كدة .. يبقى ترديهالي ..

وقفت “نهلة” قائلة :
– ماشي .. اما نشوف اخرتها ايه .. اترقى بس ويبقى عندي سكرتيرة ولا هعبرك ..

خرجت “رنيم” لتطلب من “يوسف” الدخول .. دخل وهي تجلس خلف مكتبها وتعود بمقعدها للخلف وهي لا تشعر .. ثم بدأت بالبحث عن ورق في حقيبتها ..

تنحنح قائلا :
– الورق اهو ..

قالها وهو يشير للمكتب .. نظرت للورق ثم له قائلة :
– لا دة ورق الشغل بتاعي .. يعني مسموح لي انا بس اللي استخدمه ..

رد :
– طيب ما هو دة شغل خاص بيكي ..

أجابت بحرج :
– بس حضرتك اللي هتستخدمه مش انا .. وكمان الشغل دة خاص بحضرتك قبل ما يكون خاص بيا ..

تقدمت منه “نهلة” وهي تعطيه لوحة الكترونية وقلم قائلة :
– اتفضل حضرتك اكتب في النوت دي ..

أخذها منها وبدأ يكتب وهو يفكر في كلامها ثم فجأة رفع رأسه قائلا لها :
– ورع ؟؟ ..

قالت بعدم فهم :
– أفندم ..

ابتسم وهو يجيب :
– الورق .. مرضيتيش تديهوني .. خايفة ليكون حرام ..

اضطربت وهي تشير برأسها أن لا قائلة :
– ايه .. يعني انا بقبض مرتبي بناء على وقت معين بقضيه هنا وحاجة معينة انا بعملها وعهدة مسموح لي انا بس باستخدامها .. مش اكتر ..

أومأ مبتسما وهو يعود لكتابته بينما مالت “نهلة” على أذنها قائلة :
– شكله ابن ناس .. انا افتكرته مش هيعرف يكتب عليه ..