روح وريحان بقلم ايناس عادل ج ٢

نظرت لهما “فاطمة” وهي تقول :
– لا مش عادي .. مش عادي اني اشوفكم بتتخانقوا انتو الاتنين ..

قبل “باسل” رأسها وهو يقول :
– يا ماما مش خناق والله .. دي بس مناقشة حادة .. يلا روحوا ناموا انتوا بس .. واحنا هنتصافى مع بعض مفيش حاجة صدقيني ..

أومأت “فاطمة” وهي تنظر لـ”يوسف” ووجهه الأحمر من الغضب .. ثم التفتت لتخرج ومعها “ريم” و”روح” .. بينما تحدث “يوسف” قائلا :
– وانت معاهم ..

أغلق “باسل” الباب وعاد ينظر لـ”يوسف” قائلا :
– ممكن تهدى بقى وتعقل ..

جلس “يوسف” قائلا :
– قول لنفسك الكلام دة مش ليا ..

جلس “باسل” أمامه قائلا :
– انا مغلطتش .. انا قلت كدة كاستهجان يعني .. ايه اللي يخلي صورتها متفارقش خيالك .. اكيد حاجة مميزة .. دة اللي قصدته مش اكتر .. وبعدين افرض اني عاوز اتجوز واحدة ما انا هسأل عليها ..وحقي اعرف حلوة ولا لا .. صحيح مش هعرف منك .. بس هعرف ..

نظر له “يوسف” قائلا :
– تتجوز مين ..

رد “باسل” بهدوء :
– رنيم .. يعني صاحبة اختك .. دكتورة مثقفة جدا .. دين واخلاق .. دة غير انها حسب ونسب .. فمفيش مشكلة لو تبقى كمان جميلة .. ولاحظت انها بتعامل ريحانة كانها بنتها .. فاكيد هتعامل بنتي كويس ..

بخطوات مدروسة .. يعرف “باسل” كيف يوجه تفكير “يوسف” .. يعلم أن تفكيره في “رنيم” مجرد من أي اتجاهات ومشاعر .. فلم لا يوجهه بطريقة صحيحة .. لعل وعسى تصيب هذه المرة ويتزوجها ..

بينما كان “يوسف” يشتعل غضبا من حديث “باسل” .. ولكن غضبه الآن لأنه يرى أن كلام “باسل” صحيح .. إن كان سيتزوجها فله أن يتحدث عنها .. لذلك حاول التحدث بهدوء قائلا :
– والله اختك عندك تروح تسألها عنها .. ولو انك مش محتاج تسأل يعني .. ما شاء الله عارف كل دة عنها .. لا ومثقفة جدا كمان ..

حاول “باسل” أن يخفي ابتسامته .. وهو يرى أن خطته تأتي بأكلها قائلا :
– مش لازم اعرف كل حاجة عن اصحاب اختي .. بس انت ايه رايك فيها .. كصاحبة اختك يعني ..

تنهد “يوسف” وهو يقول :
– كويسة .. وبعدين اختك بتجيب سيرتها كل 15 كلمة .. يعني قرفانا بيها .. مع احترامي ليك طبعا ..

حاول “باسل” التماسك اكثر وهو يقول :
– لا عادي .. دة لسة مجرد تفكير سطحي .. انت عارف اني لاغي فكرة الجواز دي خالص .. وكنت مقرر اني مستحيل اتجوز تاني .. علشان كدة الموضوع هيبقى صعب اني اتراجع عن القرار دة ..