روح وريحان بقلم ايناس عادل ج ٢

وبالتالي لما ضاقت بها الحيل لم تجد أمامها سوى “باسل” .. وبتردد شديد قررت أن تخبره بم حدث .. فهو الوحيد الذي يستطيع حل الخلاف القائم بينهما وبين “يوسف” .. بل والخلاف بينهما وبين “رنيم” …

الفصل الثامن

بخطى مترددة وقلب وجل أمسكت هاتفها وطلبته .. أجاب قائلا :
– السلام عليكم .. ازيك يا ريحانة

تنحنحت وهي تحاول أن تخرج صوتها جامدا قائلة :
– وعليكم السلام .. باسل لو سمحت انا كنت عاوزة اتكلم معاك ممكن ..

ابتسم قائلا :
– ممكن اوي .. بس ممكن انتي تخلي صوتك طبيعي .. مش عارفة تصلحيه يبقى تخليه زي ما هو احسن ..

ردت بضيق قائلة :
– باسل انت بجد عقدتني في صوتي ممكن معدتش تتكلم عنه لو سمحت .. انت ليه محسسني اني بدلع في كلامي .. والله عدت بخاف اتكلم مع اي حد يفسر صوتي اني بدلع ..

قال بأسف :
– لا مش بتدلعي .. انا عارف ان صوتك طبيعي .. واتكلمي عادي .. انتي مش ناقصة عقد ..

قالت مبتسمة :
– طيب جدو في الجنينة تحت .. انزل استناك معاه ..

سأل :
– هو جدو هيتكلم معانا ..

أجابت :
– لا..لا .. اقصد هيكون موجود عشان انا وانت يعني .. يعني ..

ضحك قائلا :
– خلاص خلاص .. محرم يعني .. طيب خمس دقايق واكون عندك ان شاء الله
.. سلام ..

ردت مبتسمة :
– سلام ..

——————–

ذهبت لجدها وأخبرته ألا يغادر الآن .. ثم جلست تنتظره في إحدى الجلسات المعدة في الحديقة .. جاء مبتسما على غير عادته .. عندما رأته .. وقفت وهي تتمتم :
– ربنا يستر .. جاي بيضحك .. يبقى ناوي على نية سودة .. تك ضربة في ضحكتك ..

وصل عندها وجلس وهي مازالت تتمتم .. فنظر لها قائلا :
– خلصتي ولا لسة ..

نظرت له قائلة :
– نعم ..

ابتسم قائلا :
– اقعدي .. حد قالك اني بذنب البنات ..

جلست وهي تشعر بخوف من كلامه الهادئ وحواره المبتسم .. ثم سكتت ولم تتحدث .. انتظر حديثها لدقائق ثم تنهد قائلا :
– وبعدين يا ريحان ..

اضطربت وهي تجيب :
– امممم اه .. وبعدين .. ايوة .. ايه ..

ابتسم قائلا :
– ريحان ..

اضطربت أكثر ثم قالت :
– باسل ممكن متقولش ريحان ..

عقد ما بين حاجبيه قائلا :
– هو دة الموضوع ..

كيف تخبره بالفوضى التي تشعر بها لمجرد حديثها معه ليأتي هو بكلمة “ريحان” ليقضي عليها بضربة مباشرة .. ابتلعت ريقها وهي تجيب :
– امممم اه .. لا .. هو لا .. مش دة الموضوع .. بس .. ايه .. اقصد انا هتكلم في موضوع مهم .. بس متقولش ريحان عادي .. اه عادي ..