روح وريحان بقلم ايناس عادل ج ٢

تقوست شفتيها وهي تجيب :
– بابا كان ناسي .. ينفع كدة ..

ضحكت “ريحانة” وهي تجيب :
– لا طبعا مينفعش خالص .. بس معلش كلنا بننسى اكيد مكنش يقصد ..

ابتسمت “روح” قائلة :
– تعالي اخرجي معانا ..

ردت “ريحانة” :
– واسيب جدو يتغدى لوحده مينفعش ..

قالت “روح” وهي تضم حاجبيها تعبير عن الضيق :
– بس احنا مش بنروح نتغدى وبس احنا بنروح الملاهي ومدينة الصغار كمان .. تعالي معانا عشان خاطري ..

مدينة الصغار : مكان للأطفال ليعيشوا فيه حياة الكبار .. متواجد بالفعل في اليابان تحت اسم دولة كيدزينيا .. وفيه يدخل الأطفال المكان بدون آبائهم .. ويقطعون تذكرة كتذكرة السفر .. ويستلمون نقود يتعاملون بها داخل المدينة .. يوجد بها أكثر من 80 نشاط ينقسمون بين أداء الأعمال وتلقي الخدمات ..

كمثال يعملون كعمال البنزين .. ويمتلكون سيارات يقودونها وبالطبع معهم رخص قيادة داخل المدينة ..

ومثال ثان كأن يتعرض جزء من المدينة لعطل كهربائي .. فيقوم الصغار الذين يمتهنون مهنة مهندسي الكهرباء بالذهاب للمكان المقصود وحل المشكلة ..

ومثال ثالث .. رجال المطافي والإسعاف ..

يوما ما ستصبح في بلادنا ..

ابتسمت “ريحانة” لتجيب :
– معلش يا قلبي والله ما هقدر اسيب جدو كل دة .. بس قوليلي بقى عملتي ايه في المدينة المرة اللي فاتت

اشتعلت حماستها وهي تجيب :
– انا اشتغلت دكتورة .. وكان فيه حد عيان يا حرام وانا رحت ساعدته .. ووديته الإسعاف والمستشفى .. وعملت له تنفس صناعي ببتاعة كدة على وشه .. وكمان اه اه .. اشتغلت ايه .. اه ايوة اشتغلت بطفي النار .. كان في نار كدة .. وانا لبست حاجات وطفيتها .. وكان فيه ولد كدة طويل .. اطول مني عمل امام وصلينا وراه كدة .. وولد تاني كان بيأذن .. وكمان كنت بشيل البيبي كدة واسكته لما يعيط واخليه يشرب لبن .. وقلت لبابا انا عاوزة بيبي بس هو مش راضي يجيب ..

كانت “ريحانة” تتابع حركاتها وانفعالاتها .. تضحك ثم تعبس وتحزن .. ثم تعود لتضحك مجددا .. تحرك يدها مع كل كلمة حركة تتناسب مع ما تقول .. ولما وصلت لآخر حديثها لم تستطع أن تسكت لأكثر من ذلك .. ضحكت وضحكت وضحكت .. ولما انتهت نظرت لها من بين دموعها لكثرة الضحك قائلة :
– عاوزة بابا يجيب بيبي ازاي يعني ..

رفعت كتفيها قائلة :
– مش عارفة .. بس انا عاوزة بيبي وخلاص .. وهو قالي نستنى لما عمو او عمتو او ريحانة يتجوزوا وهما يجيبوا بيبي .. ومفيش حد راضي يتجوز .. اعمل ايه دلوقتي ..