روح وريحان بقلم ايناس عادل ج ٢

اعتدل “يوسف” قائلا :
– عندك حق الموضوع مش مستاهل .. بس اللي يحطوني في موقف زي دة يستاهلوا ..

جلس “باسل” قائلا :
– لو كانوا قاصدين .. كنت اقولك يستاهلوا .. بس انت عارف انهم مش قاصدين يحصل كدة .. وبعدين ماما فعلا كانت تعبانة .. واكيد ريم قلقت عليها .. علشان كدة كلمتك ..

وقف “يوسف” واتجه لمكتبة معلقة على الحائط وضع كتابه وسحب آخر وهو يقول :
– ماما بقت كويسة الحمد لله .. اختك لما كلمتني ليه مقالتليش ان صاحبتها قاعدة معاها .. كانت تعرفني .. او تدخل تقول لصاحبتها ان انا طالع ..

همس “باسل” لابنته بأن تذهب للجلوس مع “ريم” .. خوفا أن تخرج من غرفتها وتسمع حديثهما .. ثم التفت لـ”يوسف” قائلا :
– انا معاك ان ريم غلطت .. بس انت مزودها شوية معاها .. لكن ريحانة غلطت في ايه ..

نظر له “يوسف” مندهشا ومستنكرا ثم قال :
– كانت المفروض تدخل تشوف فيه حد جوة ولا لا .. وبعدين مالك من ساعة ما جيت وانت بتدافع عن ريحانة ..

ابتسم “باسل” قائلا :
– انا مش بدافع عنها .. انت ليه محسسني اني بظلمها .. انا بتعامل معاها عادي .. بس انتو اللي معاملتكم ليها بتستفزني .. وبعدين دة مش موضوعنا .. وكمان انت غلطان .. انت مش المفروض بتخبط قبل ما تدخل .. ولا حضرتك مش عارف ابسط قواعد الزوق والاحترام ..

ابتسم “يوسف” ساخرا :
– لما ماما قالت ادخلي يا ريم .. قلت اكيد هي لوحدها .. لان مجاش في بالي ابدا ان ممكن يكون فيه حد عندها .. فدخلت ومقلتش ان انا يوسف .. انا معاك اني غلطان .. بس انت فاهم ان الموقف مأثر عليا علشانه كدة بس فبالتالي شايف ان انا تافه .. والموقف مش مستاهل .. وبما انك مش عارف ابعاده يفضل انك تسكت وتخرج لاختك الحنينة تقولها اني مش متضايق منها .. خلاص ..

وقف “باسل” قائلا :
– اه ابعاده .. انا عاوز اعرف ابعاده بقى ممكن ..

جلس “يوسف” على مكتبه قائلا :
– صورتها مبتفارقش خيالي .. ومش عاوز تريقة ولا اي تحليلات علمية .. هي كدة وخلاص ..

حاول “باسل” أن يخفي ابتسامته قائلا :
– هي حلوة اوي كدة ..

انتفض “يوسف” قائلا :
– باسل .. انت ترضى حد يقول على ريم كدة .. مالك انت حلوة ولا وحشة .. اطلع برة يا باسل .. مش عاوز اشوفك انت كمان .. اطلع برة ..

على صوته جاءت “فاطمة” و”ريم” و”روح” .. طُرق الباب ودخلن مباشرة ينظرن لكليهما .. نظر لهن باسل بحرج بالغ .. ثم أعاد نظرة عاتبة لـ”يوسف” .. وذهب نحوهن وهو يقول :
– فيه ايه بس يا جماعة .. عمركو ما شفتو اخين بتخانقوا .. عادي عادي بتحصل ..