روح وريحان بقلم ايناس عادل ج ٢

هبط لمستواها قائلا :
– حبيبة بابا بتحب ربنا صح ..

أومأت فاحتضن وجهها بكفيه قائلا :
– طيب عاوزة ربنا يحبك ولا يزعل منك ..

ردت :
– عاوزاه يحبني ..

قال بهدوء :
– يبقى متكذبيش تاني .. عشان ربنا شايفك في كل وقت .. خليه يشوفك شطورة ومبتكدبيش .. اتفقنا ..

أومأت برأسها ومازال فمها متقوسا .. فابتسم قائلا :
– انا مش هصالحك وانتي مبوزة كدة ..

اتسعت ابتسامتها حتى ظهرت نواجزها .. فضحك قائلا :
– اقفلي اقفلي لحاجة تدخل …

ضحكت بشدة وهي ترتمي بين ذراعيه ..

** علق قلب أبناءك بالله .. وأنشئهم على حبه وطاعته .. بدلا من أن تربيهم على الخوف منك .. لأن حينها سيخطئون حين تغيب أنت **

حملها وذهب بها لغرفة “يوسف” قائلا :
– دلوقتي بقى احنا هنعمل هجوم مسلح .. ومهما نتطرد من الاوضة دي مش خارجين اتفقنا …

ابتسمت وهي تقول :
– ايه دة هتصالح عمو وعمتو ..

ضحك قائلا :
– انتي عرفتي .. دول هيبوظوكي كدة ..

طرقت الباب فنادى “يوسف” :
– تعالي يا روح ..

التفتت لأبيها لتقول :
– ايه دة عرف منين انه انا ..

فتح الباب وهو يقول :
– وتفتكري فيه حد في البيت دة عنده رقتك يا قلبي …

رد “يوسف” :
– انت جاي تكمل وصلة الغزل انت وبنتك هنا …

دخل “باسل” .. ليجد “يوسف” نائما على فراشه بيده كتاب يقرؤه .. ذهب وقفز جواره .. ثم أخذ ابنته بينهما .. وأكمل حديثه معها قائلا :
– مقولتليش يا لولو .. نتيجة امتحانك طلعت ولا لسة ..

جلست فجأة وهي تصفق بيدها قائلة :
– اه وعمتو قالت لي اني شطورة خالص .. وهكون في فصلها كمان ..

قبل يدها قائلا :
– حبيبة بابا على طول شطورة ..

رد “يوسف” وهو مازال ينظر في كتابه :
– طالعة عبقرية لابوها .. هتجيبه من برة ..

ابتسم “باسل” قائلا :
– اه ممكن تجيبه من برة .. من ريحانة مثلا ..

ضحك “يوسف” قائلا :
– ايه الرضا دة كله .. اول مرة تمدحها ..

رد “باسل” :
– اصلها صعبانة عليا من اللي بتعمله فيها …

قال “يوسف” :
– طيب الاحتلال بتاعك انت وبنتك دة مطول ..

رد “باسل” :
– اه روح حبيبتي مش جايلها نوم .. فقلتلها تعالي نسهر مع عمو ..

نظر لها “يوسف” قائلا :
– والمدرسة ..

ردت “روح” :
– بكرة الجمعة ..

عاد “يوسف” لكتابه قائلا :
– اها .. الجمعة .. طيب .. وبعدين ..

تحدث “باسل” :
– مش شايف انك مكبر الموضوع اوي .. وبصراحة مش يوسف اللي يخلي حاجة زي دي تعمل فيه كل دة ..