روح وريحان بقلم ايناس عادل ج ٢

وضع رأسه بين كفيه متنهدا وهو يقول :
– حاضر يا ريحانة .. لما تقرري تبدأي ابقي صحيني ..

نظرت له قائلة :
– باسل انت نمت .. طيب قوم نام خلاص نتكلم بعدين ..

رفع رأسه لها قائلا :
– ليه يا ريحانة بتعملي فيا كدة .. ليه يا ماما انا عملت فيكي حاجة ..

نظرت له بعدم فهم قائلة :
– انا عملت فيك ايه ..

نظر لها قائلا :
– بتحاولي تخرجيني عن شعوري ليه .. يعني انا ملاحظ اني طيب وهادي خالص اهو .. وبعد كدة تزعلي وتعيطي لما اتعصب عليكي ..

وقفت قائلة :
– خلاص خلاص انا اسفة .. طيب اطلع خلاص وانا ..

قاطعها وهو يقف قائلا – وقد بدأ صوته يعلو – :
– أنا مش بلعب معاكي .. تعالى يا باسل .. اطلع يا باسل .. اترزعي هنا وقولي كنتي عاوزة ايه ..

جلست مباشرة وهي تنظر لطوله الفارع قائلة :
– حاضر حاضر …

زفر في ضيق وهو يجلس هو الآخر .. يقبض يمينه ويبسطها في تتابع .. ويتمتم بالاستغفار .. عله يهدأ .. استمر لدقائق .. ثم نظر لها قائلا :
– اتفضلي .. ايه الموضوع اللي عاوزة تتكلمي فيه ..

قالت بسرعة :
– يوسف وريم وانا …

ابتسم وقد تلاشى كل الغضب في وجهه قائلا :
– كنت عارف ان في واحدة فيكم هتيجي تطلب مساعدتي .. بس مكنتش متخيل انها هتبقى بالسرعة دي ..

قالت بأمل :
– يعني ممكن تساعدنا ..

ضحك قائلا :
– بصراحة عاوزه يربيكم شوية .. انا عارف ان يوسف باله طويل مش زيي .. فاللي يخليه يخاصمك انتي وريم لازم تبقى مصيبة ..

وجمت قائلة :
– هي مصيبة ومش مصيبة ..

سأل :
– يعني ايه ؟؟

أجابت :
– يعني اللي حصل ان لما خالتو تعبت .. ريم قلقت جامد وقلقته هو كمان وقالت له ييجي يشوف خالتو .. وبعد كدة ريم مردتش على تليفونها فهو قلق اكتر .. بس اللي هو ميعرفوش ان ريم مسمعتش التليفون والله لانها كانت مشغولة مع الضيوف .. فطلع وكلمني انا عشان اشوف له الطريق .. والله انا كنت ماشية معاه .. بس روح نادتني وكانت بتعيط فمقدرتش اسيبها وكمان انا عارفة ان مفيش حد هيقابله ومش عارفة فيه حد مع خالتو ولا لا .. هو بقى دخل وكان مع خالتو رنيم ومامتها .. ورنيم كانت .. كانت .. كانت رافعة نقابها وهو تقريبا شافها او مشافهاش المهم ان في صدام حصل .. هو افتكر ان احنا سيبناه يدخل واحنا عارفين ان خالتو معاها حد .. ورنيم زعلت ان احنا ازاي منقولهاش ان فيه حد ممكن ييجي ..