روح وريحان بقلم ايناس عادل ج ٢

في طريقهن مررن على محطة انتظار .. نظرت “ريم” لامرأة جالسة .. يبدو عليها الحزن .. ولـ”ريم” حب أسطوري لرسم ابتسامة على وجوه من حولها .. وإدخال السرور على القلوب .. توقفت جانبا والتفتت لتخرج حلواها المفضلة من حقيبتها .. ثم نظرت لهما قائلة :
– ثواني يا بنانيت .. هعمل حاجة وجاية ..

أومأت كلتاهما .. وتحدثتا سويا .. بينما ذهبت “ريم” لتجلس جوار تلك السيدة وهي تمد يدها بحلواها قائلة :
– مش مستاهلة الزعل دة كله ..

رفعت “نور” رأسها وقد ظهر الاندهاش على ملامحها قائلة :
– أفندم ..

ابتسمت “ريم” قائلة :
– الدنيا .. مش مستاهلة الزعل دة كله ..

ابتسمت “نور” وهي تومئ برأسها .. فمدت “ريم” يدها قائلة :
– طيب ممكن تتفضلي دي .. دي شيكولاتي المفضلة .. مش بتخرج غير للغاليين ..

ضحكت “نور” قائلة :
– غاليين مرة واحدة .. ربنا يعزك ..

ابتسمت “ريم” وهي تقول :
– يارب .. ممكن تتفضليها بقى ..

أخذتها “نور” وهي تقول :
– شكرا ..

ضحكت “ريم” قائلة :
– عفوا .. بس متزعليش كدة تاني .. بقيتي عسولة لما ضحكتي اهو .. تعالي اوصلك لو مش مستنية حد ..

ردت “نور” :
– متشكرة يا حبيبتي بس انا مستنية زوجي .. هييجي حالا ..

وقفت “ريم” قائلة :
– تحبي استنى معاكي او محتاجة اي حاجة اساعدك بيها .. متقلقيش ريم يعتمد عليها ..

ردت “نور” ضاحكة :
– جزاكم الله خيرا .. اتفضلي انتي علشان معطلكيش اكتر من كدة .. حلو اسم ريم .. لو جاتلي بنوتة هسميها ريم ..

ضحكت “ريم” وهي تنظر لبطنها المتكورة قائلة :
– شكله ولد .. اسمعي مني .. مجهزة الاسم ولا لا ..

ردت “نور” قائلة :
– اه طبعا .. طارق ان شاء الله ..

وجمت “ريم” وهي تقول :
– حلو اسم طارق .. ربنا يقومك بالسلامة .. بعد اذنك يا ..

– نور ..

قالتها “نور” مبتسمة .. ثم نظرت للسيارة التي توقفت وهي تقول :
– اهو احمد زوجي وصل اهو …

ابتعدت “ريم” خطوة دون أن تنظر له .. وهمت لتغادر .. لولا نظرة خاطفة وليتها ما فعلتها ..

رأته يقبل نحوها بلهفة قائلا :
– نور حبيبتي انتي كويسة ..

أومأت “نور” مبتسمة وهي تقف مستندة عليه .. وهو يحيطها بذراعيه قائلا :
– حقك عليا يا قلبي انا اسف ..

توقف الزمن .. وتجمدت مكانها .. نظرت لسيارتهما التي اختفت .. وهي تشعر أن أوهامها وأحلامها اختفت معهما ..