الداغر بقلم اسماء الاباصيري ج2
استمرت تاج ببكائها فى صمت
ريم : خلاص اهدي بقى ….. طب هو داغر عملك حاجة ؟
اومأت تاج لتردف بغضب طفولى
تاج : و هو في غيره … هو على طول كده بيزعلني
ريم بضحك مقلدة اسلوبها الطفولى : على طول كده بيزعلني …… يا بنتي تلاقيكي عصبتيه ولا حاجة وهو اصلا اليومين دول مش طايق نفسه مش عارفة في ايه بس اقولك … شكلكم فعلاً مش بتتفقو خالص …. ليه كده؟
تاج بتوتر : مش عارفة
ريم : عليا برضو ….. ماااشي هحاول اصدق ….. اهدي بقى كده شوية و اسمعى هقولك ايه ؟
تاج : ايه ؟
ريم : عارفة الخميس الجاي يبقى ايه فى الايام
حركت رأسها بالنفى لتكمل الاخرى
ريم : هيبقى عيد ميلاد ابيه داغر و الظاهر كده انه ناسي خالص زي كل سنة
تاج بحماس : طب و هنعمل ايه ….. نعمله حفلة مفاجأة و نطفى النور و ……….
ريم بتهكم : بس بس .. حفلة و نطفى النور ايه .. مش سي داغر ده اللى على طول قاصد يزعلك و كنتي تعيطى بسببه من دقتين بس اقول ايه ما انتى طيبة و غلبانة .. مش عارفة حاجة …. ده يا ستى مش الجو بتاع داغر خالص …. انا حبيت اقولك لتكونى عارفة و تعملي حاجة من الحاجات دي بجد …. ده كان علقني انا و انتى
تاج بتعجب : ليه هو مش عيد ميلاده و طبيعي يحتفل بيه
ريم : ده الطبيعي فعلاً بس داغر مش كده ….. مرة عملنهاله مفاجأة قلب الليلة كلها نكد
تاج : طب هنعمل ايه ؟
ريم : ولا اى حاجة … انتى زي الشاطرة كده و بما انك مكنتيش تعرفي اى حاجة عن عيد ميلاده هأعتبري نفسك مسمعتيش منى اى حاجة و عدي الليلة
تاج : طب و عيد ميلاده
ريم : هتقضي اليوم عادي جداً و لا اى اندهاش
تاج : طب و الهدية ؟
ريم : اقولها ايه دي … يا بنتى بقولك مش بيحتفل تقوليلي هدية …. تاج الله يهديكى بلاش جنان و عدي الليلة على خير .. ماشي
صمتت للحظات قبل ان تجيب بتردد دون اقتناع
تاج : ماشي
مضت الليلة بسلام ليأتي صباح يوم جديد اعتكفت فيه غرفتها دون خروج … حاولت ريم و والدتها معرفة ما بها دون اى رد من ناحيتها سوى انها ترغب بالبقاء وحيدة ….. فى حين اغتاظ الاخر من فعلتها و تجنبها اياه فليست المرة الاولى التى يصرخ عليها او يؤنبها على اية فعلة تقوم بها لذا لما الانعزال تلك المرة و تجاهله هكذا
اما هى فكان سبب انعزالها هو داغر نفسه لكن ليس غضباً او حزناً منه بل لتستطيع تحضير هدية لعيد ميلاده …. لم تهتم كثيراً لحديث ريم بل قررت انها لو لن تحتفل بعيد الميلاد خاصته فعلى الاقل ستهاديه بشيء ما … و بما انها من الصعب توفير مال خاص بها لتشتري به شيئاً ما .. قررت صنع هديته بنفسها
