روح وريحان بقلم ايناس عادل ج ٤

ابتسمت “ريحانة” وهي تقبل عليها قائلة :
– لو تقوليلي بس على سر الصنعة .. ازاي بتعرفينا من غير ما نتكلم ..

همست لها “جميلة” :
– مين اللي جاي معاكي وواقف متحركش دة ..

ضحكت “ريحانة” قائلة :
– دة باسل جاي يوصلني ..

وقفت “جميلة” تستند على “ريحانة” ثم قالت :
– اتفضل يا دكتور باسل .. بابا وعمو فوق ..

أومأ “باسل” برأسه قائلا :
– ازيك يا انسة جميلة ..

ردت “جميلة” :
– الحمد لله بخير .. تحب انادي لبابا ..

وضع “باسل” حقيبة “ريحانة” أرضا وهو يقول :
– متشكر جدا .. انا جيت اسلم لكم ريحانة بس وهمشي علطول .. خلي بالك منها ..

أومأت “جميلة” وهي تشد على يد “ريحانة” قائلا :
– مش هقدر اقولك من عنيا بس اكيد هي في قلبي ..

التفت “باسل” وهو يلقي نظرة أخيرة على “ريحانة” قائلا :
– بعد اذنكم السلام عليكم ..

بينما التفتت “ريحانة” لـ”جميلة” قائلة :
– بقى كدة مش عاوزاني اكون في عنيكي ..

ابتسمت “جميلة” قائلة :
– لو عندي عيون مش هتغلى عليكي .. وبعدين قلبي مش مكفيكي ..

قبلت “ريحانة” كتفها قائلا :
– طيب ايه اللي مقعدك هنا بقى يا جميل ..

عادت “جميلة” لتجلس على مقعدها قائلة :
– بنات عمك جايين هما وولادهم دلوقتي .. وحشوني اوي من الاسبوع اللي فات .. ومش قادرة استناهم فوق .. نزلتلهم هنا ..
ثم قالت :
– امال ليه يا ريحانة بتقوليلي ان باسل بيعاملك زي اخته ..

انتبهت “ريحانة” قائلة :
– نعم ..

ابتسمت “جميلة” قائلة :
– كان بيبصلك وهو بيقول بعد اذنكم السلام عليكم ..

نظرت لها “ريحانة” بشدة قائلة :
– عرفتي ازاي .. جميلة انتي بتشوفي وبتضحكي علينا ..

ضحكت “جميلة” قائلة :
– بشوف بقلبي .. صوته اتغير في الجملة دي .. ودة مش صوت واحد بيكلم اخته .. انا كنت حاسة بحاجة زي كدة لما حكيتي لي على تصرفاته معاكي في الفترة الاخيرة ..

سألت “ريحانة” :
– حاسة بإيه ..

وقفت “جميلة” قائلة :
– البنات اتأخروا وانا لسة مصليتش الضحى .. قومي وبعدين نكمل كلامنا بعدين ..

أمسكت “ريحانة” يدها فنزعتها “جميلة” وهي تقول ضاحكة :
– يا بنتي قلت لك اني حافظة بيتنا .. متخافيش مش هيجرالي حاجة .. دة انتي ممكن تقعي وانا اللي انقذك ..

ابتسمت “ريحانة” وهي تسير جوارها حتى وصلت لحقيبتها فانحنت تحملها .. سبقتها يد قائلة :
– عيب يا بنت عمي .. كفاية نورك في بيتنا سيبينا نخدمك بقى ..