روح وريحان بقلم ايناس عادل ج ٤

ابتعدت “ريحانة” عن “يوسف” في حرج .. ولكن لم يفلتها “يوسف” وهو يحيطها بذراعه قائلا لـ”باسل” :
– مالك يا باسل .. اسيبك اسبوعين تبقى حقود كدة .. وبعدين لسة جولييت التالتة .. ريم .. ولسة الأميرة الصغيرة .. ولسة ماما .. كلهم جولييت .. متدخلش انت بس ..

ثم نظر لـ”ريحانة” قائلا :
– عاملة ايه يا قلبي ..

– بخير يا حبيبي والله طالما شوفتك ..

قال “باسل” ساخرا :
– قلبي وحبيبي .. اجيب شجرة واتنين ليمون بالمرة ..

ضحك “يوسف” قائلا :
– اه يا ريت يا باسل .. وواحد يعزف لو سمحت ..

تبرم “باسل” وهو يتركهما قائلا في ضيق :
– طيب يلا ماما مستنياك .. وبطلوا الدلع الفاضي دة ..

نظرت “ريحانة” لـ”يوسف” قائلة :
– هو فيه ايه ..

غمز لها “يوسف” وهو يقول ضاحكا :
– سيبك منه .. متركزيش معانا .. ويلا علشان كدة خالتك هتعلقني ..

———————-

في مكتبه بالجامعة .. لا يستقبل “باسل” ضيوف أو أصدقاء .. فقط وقته يخص طلابه .. منذ يومين يأتيه شخص لا يعرفه ولا يترك بياناته .. فقط يطلب مقابلته ولكن تقابله سكرتيرته بالرفض .. في اليوم الثالث قرر أن يعرف من هذا الشخص الذي يصر على مقابلته دون ملل .. فطلب من سكرتيرته أن تخبره حين يأتي .. وهذا ما حدث .. فخرج ليجد “طارق” ..
زفر في ضيق ثم قال :
– تعالى يا طارق .. اتفضل ..

دخل “طارق” شعوره بالحرج يسبقه .. جلس “باسل” خلف مكتبه وعاد لينشغل في عمله .. ولم يعير “طارق” أي اهتمام ..

تنحنح “طارق” قائلا :
– باسل .. متصعبش الموضوع عليا لو سمحت ..

رفع “باسل” رأسه ينظر له قائلا :
– الموضوع صعب لواحده يا طارق .. طيب تعالى نعكسها واعتبر ان انا اللي عملت في حد من اخواتك كدة .. او حتى بناتهم .. وانا هرضى برد فعلك .. اللي انت هتعمله ساعتها انا هعمله .. لو انت هتاخد الموضوع عادي انا معنديش مشكلة وهاخده انا كمان عادي ..

طأطأ “طارق” رأسه ولم يرد .. بينما عاد “باسل” لعمله مجددا .. بعد دقائق رفع “طارق” رأسه قائلا :
– طيب ايه اللي يرضيك وانا اعمله .. غير انك ترفض طلبي ..

نظر له “باسل” قائلا :
– انت لسة مصمم على طلبك دة ..

قال “طارق” :
– فيه ايه يا باسل هو كان لعب عيال ..

رد “باسل” :
– اللي انت عملته هو اللي لعب عيال ..

تنهد “طارق” قائلا :
– خلاص بقى يا باسل .. قلت لك والله ما قصدت اضايقها ولا اخوفها .. وما قصدتش الحاجات الغريبة اللي انت فاهمها دي ..