روح وريحان بقلم ايناس عادل ج ٤

فقالت من بين دموعها :
– يوسف حرام عليك اللي بتعمله فيا دة والله حرام .. يعني علشان بحبك تعمل فيا كدة .. يا ريتني ما حبيتك ولا شوفتك .. يا ريتني ما اتجوزتك ..

ظلت تهذي وظل يسمعها بسعادة مختلطة بشجن .. ماذا فعل فيها لتبقى كذلك .. كيف آذاها .. ولماذا جرحها .. وبعد أن انتهت .. ضم رأسها لصدره ثانية .. وهو يربت رأسها حتى هدأت ..
ثم قال :
– مش قلت لك انك بتحبيني وبت*م*و*ت*ي فيا كمان ..

ابتعدت عنه وهي تدفعه في صدره قائلة :
– خلاص بقى انت ما بتصدق ..

————————-

استأذنت “ريحانة” للعودة لبيت أعمامها ووافق جدها .. بحثت عن “يوسف” حتى يوصلها ولم تجده .. وفي طريقها وجدت “باسل” فاقترح جدها عليها أن يوصلها هو .. رفضت لأنها أرادت أن تجعله يشعر بغربته تجاهها .. ووصل له ما أرادت .. ولكن جدها أصر .. فوافقت على مضض .. وقبل أن تذهب معه أخرجت من حقيبتها أوراقا ثم قالت :
– باسل لو سمحت .. معلش هطلب منك خدمة اصلي دورت على يوسف ومش موجود ..

نظر لها قائلا :
– هو فيه فرق بيني وبين يوسف ..

استغربت صوته وهي تقول :
– لا طبعا انتم الاتنين اخواتي .. مكنتش عاوزة اتعبك معايا بس ..

رد ساخرا :
– ما انتي لسة قايلة احنا الاتنين اخواتك .. لو متعبتش لاختي هتعب لمين ..

لم تهتم لسخريته وقالت :
– طبعا عارف جميلة بنت عمي ..

ظهر على ملامحه الجدية وهو يقول :
– اه طبعا ..

أعطته الأوراق التي تحملها قائلة :
– دي التقارير الخاصة بيها .. كل العمليات اللي عملتها في عنيها .. وكل الفحوصات .. انا عارفة ن دة مش مجالك خالص .. بس انا عارفة انك كمان مطلع جيد على الجديد في الطب .. فممكن بعد اذنك تقولي هي لو عملت عمليتها ممكن تنجح وتشوف ولا لا ..

أخذ منها الأوراق .. ثم أخذ ينظر فيها ويقرأ المكتوب بدقة .. وبعد فترة رفع عينيه لها قائلا :
– على حد علمي انها كانت المفروض تخف من اول عملية عملتها .. بس فيه خطأ حصل .. لو ممكن تسيبيهم معايا واعرضهم على متخصص يكون افضل وهو اكيد هيفهم احسن مني .. بس فيه امل ان شاء الله ..

لمعت عينيها قائلة :
– بجد يا باسل .. ممكن تفتح وتشوف تاني ..

أومأ باسما .. فما فتأت تتمتم بكلمات الشكر .. بينما هو شرد فيها .. مازالت تحاول أن تكون سببا في سعادة الجميع .. وتهتم لأجلهم .. مازالت تسعى لسعادة الجميع ..