روح وريحان بقلم ايناس عادل ج ٤

مالا يعرفه أنها لم تعد كما كانت .. فقبل كانت شمعة تحترق لأجل الجميع .. وتلك ثقافة خاطئة .. لكن الآن فهي باستطاعتها السعي لسعادة الآخرين ولكن قبلهم تحافظ على سعادتها هي ..

قبل أن تركب معه سألت :
– هي فين روح .. كنت عاوزاها تيجي معانا اصلي ملحقتش اقعد معاها ..

ابتسم وهو يقول :
– انتي فعلاعاوزة روح علشان كدة .. ولا علشان متكونيش معايا لوحدك ..

ما أسوأ أن يستطيع الآخرون قراءة أفكارك .. ركبت في الخلف وهي تقول :
– انا اسفة اني ساعات بتطفل على تربيتك لبنتك .. انا عارفة انك بتخاف عليها مني .. بس انا مقصدتش انقلها عدوى الخوف اللي عندي ..

أصبحت لئيمة .. نقلت مشاعره ببراعة من مكان لآخر .. فهذه نقرة وتلك نقرة أخرى .. ولكن الاثنين يؤلمانه .. أن تريد “روح” معها لأنها لا تريد أن تبقى وحيدة معه .. وأن تعلم أنه كان يخاف على ابنته منها ..

انطلقا بسيارته .. وبعد فترة قال :
– انتي ليه هترجعي عند ولاد عمك تاني .. مع ان دي اول مرة تطولي هناك كدة ..

ابتسمت قائلة :
– حسيت اني مقصرة مع اعمامي فحبيت اكون معاهم لفترة .. وقلت لجدو اني هبقى اعدي عليه كل يوم بعد شغلي علشان مش هقدر اقعد الفترة دي بعيد منه ..

ابتسم قائلا :
– مش هتقدري تبعدي عن جدك بس ..

ردت ببساطة :
– لا طبعا وخالتو ويوسف وريم ورنيم وكلكم يعني .. وروح طبعا دة بعد اذنك ..

اختفت ابتسامته قائلا :
– بعد اذني .. يعني انتي مصدقة اني ببعد روح عنك .. وبعدين كل دول مش هتقدري تبعدي عنهم ..

لماذا لم تخص اسمه مثلهم .. ولماذا تضع بينهما كل تلك الحدود ..
تخطى ما قال وما قالت .. ثم قال :
– اخبار البرنامج اللي بتصمميه ايه ..

ابتسمت قائلة :
– الحمد لله .. فيه امل اني اعمل حاجة ..

ابتسم قائلا :
– انتي الامل كله .. وانا دايما واثق انك تقدري تعملي حاجات ..

وجمت ثانية وهي تقول :
– باسل .. انت متأكد ان جميلة هتشوف تاني وعنيها هتبقى طبيعية ..

أجاب :
– خلي املك في ربنا كبير ..

بقيت على وجومها قائلة :
– بس هي مش راضية تعمل عمليات تاني .. اعملها ايه علشان توافق ..

أجاب :
– لو عندها سبب نفسي .. ممكن نخلي يوسف يرشحلها دكتورة نفسية كويسة .. وممكن يكون سبب فشل عملياتها اللي قبل كدة انها مش متقبلاهها نفسيا ..

وصلا .. فتركت السيارة قبله .. حمل حقيبتها وسار جوارها حتى دخلا .. وجدا “جميلة” تجلس في مدخل البيت .. فذهبت نحوها “ريحانة” وقبل أن تصل إليها قالت “جميلة” :
– انتي مش قلتي يومين وراجعة .. تفضلي عند جدك 3 ايام ليه ..