روح وريحان بقلم ايناس عادل ج ٤

يحب حركة عينيها حين تجفل .. وحمرة خديها حين تخجل .. عض شفتيها حين تضطرب .. لماذا اختفت كل هذه الأشياء ..
سحبتها “ريم” من أمامه وأخذتها لغرفتها .. حنق على “ريم” لأول مرة .. واختفى في غرفته .. بينما نظر لهما “يوسف” وهو يهز رأسه ساخرا ..

في غرفة “ريم” جلستا على سريرها وقالت “ريم” :
– كدة اهون عليكي تبعدي عني المدة دي كلها ..

قبلت “ريحانة” وجنتها قائلة :
– ولا عمرك تهوني عليا .. بس كنت محتاجة الفترة دي جدا .. وكمان هروح تاني بس فترة اطول شوية .. جيت استأذن جدو الأول ..

وجمت “ريم” قائلة :
– ليه .. انا ما صدقت انك ترجعي .. محتاجاكي جنبي اوي الفترة دي ..

ابتسمت “ريحانة” قائلة :
– في اي وقت هتحتاجيني هتلاقيني عندك .. وعمري ما هتأخر عنك ابدا .. بس نفسي اكون جنب جميلة الفترة الجاية ..

قالت “ريم” باسمة :
– جميلة .. سلمي لي عليها .. نفسي اشوفها اوي ..

ردت “ريحانة” :
– الله يسلمك .. قولي لي عاملة ايه مع طارق ..

ضحكت “ريم” قائلة :
– مجنناه وهو مجنني .. احتمال نعمل الفرح في مستشفى المجانين ..

ابتسمت “ريحانة” قائلة :
– حبيبتي ربنا يسعدكم ويفرحكم .. ويتمم فرحتكم على خير ..

تنهدت “ريم” قائلة :
– اللهم امين .. تعرفي انه هيعمل بيتنا هنا علشان افضل جنبكم ..

علقت “ريحانة” بسعادة :
– ربنا يبارك لك فيه ويجعله نعم الزوج ليكي .. رنيم بقالها كم يوم مبتردش على موبايلها ليه ..

وجمت “ريم” قائلة :
– انا اصلا مشوفتهاش من يوم خطوبتي .. ولا حتى كلمتها ..

عقدت “ريحانة” ما بين حاجبيها قائلة :
– ليه كدة يا ريم ..

رفعت “ريم” كتفيها قائلا :
– والله من غير ما اقصد .. الاسبوع اللي فات كله كنت مشغولة مع طارق وساعات بنخرج وماما مشغولة معانا .. وبعدين نور ولدت .. فانشغلت معاها دة غير شغلي ..

هزت “ريحانة” رأسها موافقة ثم قالت :
– خلاص يبقى نرجع تاني لليوم اللي كنا بنتقابل فيه كل اسبوع .. علشان حتى اضمن اشوفكم الفترة الجاية .. وانا هسأل يوسف عنها لأني شاكة في امرهم بصراحة ..

ابتسمت “ريم” قائلة :
– يا ريت والله يا ريحانة .. انا كمان زعلانة من نفسي اوي اني مكلمتش رنيم الفترة اللي فاتت وقلقانة عليها اوي ..

ثم تنحنحت قائلة :
– ريحانة .. انتي ايه اللي مغيرك كدة ..

ابتسمت “ريحانة” قائلة :
– عارفة لما تكون رسالتك في الحياة انك تخلي اللي حواليكي سعداء بس قبل كدة لازم تكوني انتي نفسك سعيدة .. انا بحاول اعمل كدة ..
ثم وقفت قائلة :
– دلوقتي بقى اخطفي لي يوسف هنا عاوزة اقرره واعرف عمل ايه في رنيم ..