روح وريحان بقلم ايناس عادل ج ٤

نظر لها “يوسف” بحيرة يائسة ثم عاد ينظر لـ”باسل” .. ثم اقترب يجلس جواره .. قائلا :
– خير .. مالك ..

تنهد “باسل” قائلا :
– ريم .. متقدملها عريسين ..

ابتسم “يوسف” وهو يقول بسعادة مختلطة ببعض شجن :
– ودة اللي مزعلك اوي كدة .. مين ؟

رد “باسل” :
– مش زعلان .. بس متأثر بأنها ممكن تسيبنا مش اكتر .. اما بقى مين .. الاتنين محيريني .. طارق .. وحسام ابن عمك ..

اعتدل “يوسف” ناظرا له :
– حسام ابن عمك .. وعرفناه .. مين طارق بقى ..

نظر له “باسل” قائلا :
– طارق صبري ..

ابتسم “يوسف” قائلا :
– ابن طنط سوسو .. لا طبعا .. وكمان حسام ابن عمك لا طبعا ..

ضحك “باسل” قائلا :
– ليه بقى .. يعني الاتنين لا ..

رد “يوسف” :
– طارق كويس بس انت عارف يعني ايه عنده عشر اخوات بنات .. ازاي بقى اسيب اختي تعيش معاه كدة وانا مش عارف اخواته ممكن يعملوا فيها ايه .. مش عارف هو طبيعة تعامله معاهم ازاي .. يعني ممكن يكونوا هما اللي بيمشوه مثلا ..

أشار “باسل” برأسه أن لا قائلا :
– لا لا انا واثق ان طارق مش كدة خالص .. ولو دة سبب رفضك يبقى ملوش داعي .. رافض ابن عمك ليه بقى ..

رفع “يوسف” رأسه ينظر للسماء قائلا :
– علشان طلب ريحانة قبل كدة واترفض ..

وقف “باسل” قائلا بغضب :
– افندم .. طلب مين .. امتى دة حصل .. وازاي انا معرفش ..

وقف “يوسف” قائلا :
– وتعرف ليه .. هو اتقدم وهي رفضته وانت مسافر .. وبعدين مش قلت قبل كدة ان دي حاجة تخصها .. وانت ملكش دعوة ..

رد “باسل” بنفس الغضب :
– انا قلت كدة علشان جدك هو اللي طلب اني مدخلش .. وبعدين ازاي حسام دة يطلب ريم بعد ما طلب ريحانة ..

قال “يوسف” :
– انت بجد حيرتني يا باسل يعني انت زعلان انه طلب ريم بعد ما طلب ريحانة ولا زعلان انه طلب ريحانة اصلا ..

– الاتنين ..
قالها دون تفكير .. ثم ندم ..

بينما ابتسم “يوسف” قائلا :
– والله .. خلاص يبقى نفكر في طارق ..

جلس “باسل” قائلا :
– طارق !! .. طيب قول لجدك بقى .. لو وافق نبقى نقول لريم ..

تركه “يوسف” ليخبر جده .. وجلس هو يفكر في “ريم” ولكن أشرك “ريحانة” هي الأخرى في تفكيره .. لماذا غضب من أن ابن عمه تقدم قبل لخطبتها .. رغم أنه يعلم أخلاقه وكذلك فرح لخطبته “ريم” لولا ظهور “طارق” الذي علم كم يحب “ريم” .. وهو يعتبر “ريحانة” كـ”ريم” .. إذا لماذا غضب بعد ظهور الفارس الذي دائما ما يخبرها أنها تستحقه .. كل مرة كان يتألم لحبها له .. كان يقول أنها تستحق فارس .. وبعد أن جاء الفارس ثار وغضب .. قد يكون لأن ابن عمه غير مناسب لصغيرته “ريحانة” .. مؤكد أن هذا سبب غضبه .. هو مناسب لـ”ريم” .. لكن غير مناسب لـ”ريحانة” .. شخصية “ريم” تختلف عن شخصية “ريحانة الهادئة الرقيقة ..