سبر اغوار قلبي بقلم نورهان سامي ج8
هزت تالا رأسها نافية لتقول منال بابتسامة : توتة ما شاء الله لسة خاتمة الجزء السادس من القرآن
نظرت لها تالا بدهشة و قالت بتساؤل : طب مين اللى بيحفظها ؟
منال بابتسامة : سارة هى اللى كانت بتحفظها قبل ما تحمل بس بعد ما حملت مبقتش تقدر غير كل فين و فين فبقيت أنا أحفظها شوية و أدهم لو كان فاضى و أنا مش فاضية كان بيحفظها شوية و محمد شوية لما بيفضى و مراد برده لما سارة تزن عليه أنه يحفظها .. أردفت قائلة بتساؤل : هى قالتلك محمد جابلها السلحفة ليه ؟
حركت رأسها نافية و قالت بجدية : قالتلى إنها شطورة بس
ابتسمت منال لها و قالت بجدية : محمد و سارة كل جزء تحفظه بيجبولها هدية عشان تتشجع و تحفظ اللى بعده .. ده غير هديتى و هدية أدهم اللى كان بيبعتهلها من بره طول فترة سفره لما كان يعرف إنها حفظت جزء جديد و مراد برده نفس الكلام
ابتسمت تالا لها بتفهم و قالت بابتسامة : بسم الله ما شاء الله و هى تتمنى بجعبتها أن تنجب أطفال لتربيهم على نهج صحيح صائب و ترى أطفالها يترعرعون بأخلاق حميدة كريمة حافظة للقرآن .
نظرت لها منال و قالت بابتسامة : رجلك عاملة ايه دلوقتى يا حبيبتى ؟
ابتسمت تالا برضا و قالت بجدية : الحمد لله بقيت كويسة شوية
منال بتساؤل : تحبى نحجز عن دكتور و نروح
هزت رأسها نافية ثم قالت بابتسامة صغيرة : لا مش مستاهلة دكتور
ابتسمت منال قائلة : طب يا حبيبتى ذاكرى و لو عوزتى أى حاجة اندهيلى
ابتسمت تالا لها و قالت بامتنان : شكراً أوى يا ماما .. أنا بجد مش عارفة أقولك أيه !
ابتسمت تالا لها و قالت بجدية : ماتقوليش حاجة يا حبيبتى أنتِ زى سارة و أدهم
ابتسمت تالا لها و أنزلت قدمها عن السرير لتقول منال بتساؤل : راحة فين يا حبيبتى ؟
تالا بجدية : هسلم على سارة
منال بجدية : خليكى سارة مش بره أصلاً .. ده محمد جاب توتة و مراد و مشى
اؤمأت تالا برأسها بتفهم و قالت بجدية : كده كده العصر قرب يدن فهقوم أتوضى
ابتسمت منال لها و قالت بجدية : ماشى يا حبيبتى .. تقبل الله مقدماً
جلست على أقرب كرسي قابلها فقد تعبت من التنظيف فقوتها لم تعد كسابقتها لكن ليس بيدها حيلة حتى تسكت أبنها و ترحم تلك المسكينة النائمة بالداخل من بطشه .. نظرت للساعة لتجد أن موعد قدومه أقترب .. حملت على نفسها و قامت لتكمل تنظيف الشقة قبل أن يأتى و يسمعهم صوته الجهورى و هو ينهرهم و يوبخهم .. لن تلومه على أسلوبه هذا فتربيتها هى و والده و كل من حوله هى السبب الأساسى لما هو فيه الأن .. هى السبب الأساسى فى طريقته تلك و تعامله بهذا الشكل .. كيف لا و هو كان يرى أبوه يعامل أمه هكذا و أن كل السلطات بيده .. سلطات الأمر و النهى .. هو الآمر و الناهى الوحيد .. كيف لا و هى نفسها عودته و دلعته أن يفعل كل ما يريده دون أى تبويخ .. كيف لا و صابرين و عمه و والده نفسهم عودوه أن له السلطة المطلقة على لميس و أن كلمته هى التى يجب أن تمشى و أن تحكمه بها و أمره و نهره إياها أمر واجب عليه فعله .. كيف لا و قد عود و ربى على أنه الرجل و طالما هو الرجل فلا يعيبه أى شئ ولا يخطئ ابداً .. دائماً هو الصواب .. كيف سيتعامل مع المرأة كروح إنسانية و هو تربى أنها شئ مادى يلبى أوامره و يمتنع عن نواهيه !
