سبر اغوار قلبي بقلم نورهان سامي ج8

اؤمأت تالا برأسها و أكملت تناولها للطعام .. بعدما أنتهوا من تناول الطعام .. قامت منال و حملت الصنية إلى المطبخ لتذهب أسيل وراها و تسألها إذا كانت تحتاج مساعدة .. أما تالا فظلت جالسة تفكر بكلام منال و أسيل و تقلبه برأسها .. قطع تفكيرها دق الباب و من ثم دخول أدهم عليها و هو يحمل حقيبة كبيرة تجهل ما بداخلها .. جلس بجانبها على حافة السرير كعادته و قال بتساؤل : رجلكِ عاملة ايه دلوقتى ؟

قالت دون أن تنظر له : الحمد لله

أدهم بتساؤل : محتاجة أوديكِ لدكتور قبل ما أسافر

هزت رأسها قائلة بجدية : لا

أدهم بتساؤل : متأكدة

اؤمأت برأسها دون أن تتكلم .. فتح الحقيبة و قال بجدية : ديه كل كتبك اللى كانت فى الفيلا .. الإمتحان فاضله 15 يوم بالظبط .. هتذاكرى و تمتحنى ولا نأجل السنة ديه

ظلت صامتة لبعض الوقت تفكر ثم قالت بجدية : مش هأجل

اؤمأ برأسه قائلاً بتفهم : يبقى أحسن برضه .. أخرج بعض الأوراق و قال بجدية : ده ورق متصور من كشكول أشطر بنت فى الدفعة .. ماسبتش محاضرة غير و حضرتها .. ذاكريهم كويس بقى

نظرت له بغيظ و قالت من بين أسنانها : و هى أدتك تعبها بسهولة كده عشان تصوره و كمان من غير ما تعرفك

تنهد بضيق و قال بجدية : يهمك فى ايه ؟ مش أهم حاجة الورق عندك

تنهدت بغيظ و صمتت ليخرج هو فيزا كارد و يضعها بيدها مع ورقة صغيرة بها الرقم السرى .. نظرت له بإستغراب ليقول هو بجدية : ديه فيزا كارد تصرفى منه و تجيبى أى حاجة إنتِ عايزاها

مدت يدها له به و قالت بجدية : مش عايزاه .. أنا معايا الفيزا كارد بتاعى بسحب من الفلوس اللى بابا كان حططهالى فى البنك

أغلق يدها على الفيزا كارد قائلاً بضيق : أديكِ قولتى بابا .. و أنا ماسمحش إنك تبقى على ذمتى و تصرفى من فلوسك أو فلوس عمى الله يرحمه

ارتسمت ابتسامة سخرية على ثغرها وقالت : و هى فلوسك اللى فى الكارد ده مش مصدرها بابا برده

أمسكها من وجهها و اقترب منها لتصبح عينها مقابل عينه الذى تخترقها كالصقر و قال و هو يضغط على أسنانه بغضب : فعلاً ممكن يكون جزء من فلوسى اللى فى الكارد ده مصدرها أبوكِ بس لما كنت باخدهم منه كنت بخدهم كموظف بيأدى شغله على أكمل وجه فبالتالى بيحصل على مرتب نتيجة تعبه فى الشغل .. أبعد يده عن وجهها و قال بجدية : و بعدين ايه اللى مخليكِ متأكدة أوى كده إنى اتجوزتك عشان قبضت من أبوكِ فلوس مقابل جوازى منك .. أشار بيده حوله و هو يقول : أنتِ شايفة أنتِ ساكنة فين ؟ تفتكرى إنى محتاج الفلوس اللى كنت هاخدها من أبوكِ .. بصى حواليكِ و قوليلى شيفانى محتاج لفلوس أبوكِ أصلاً .. أردف بجدية قائلاً : تعرفى أن أبويا كان بيتحايل عليا عشان أشتغل معاه فى البترول أو يفتحلى شركة و أبقى أنا رئيسها بس أنا اللى كنت برفض عشان كنت عايز أبدأ من الصفر و أعتمد على نفسى و أتعب عشان لما أوصل للنجاح بعد تعب أحس بلذته و جماله .. تفتكرى اللى رفض فلوس أبوه عشان يعتمد على نفسه هيروح للغريب عشان ياخد منه فلوس مقابل جوازه من بنته