لمن القرار سهام صادق ج 10

دمعت عيناها رغماً عنها، تتذكر ضفائرها وفستانها الطفولي وقد خلعت عنها كل هذا لترتدي ثوب المرأة

– أنا مبقتش عارفه نفسي يا مدام ألفت

طالعتها السيدة ألفت بتفهم، تمدّ كفها تمسح فوق وجنتها بأمومه

– عارفه يا بنتِ إنك تايهه، والحياة الجديده كبيره عليكِ..، يمكن سليم بيه غلط لما سابك تندمجي في حاجات كتير، فاكر إنك هتنضجي مرة واحده، لكن برضوه يا بنتِ الغلط من عندك أنتِ

علقت عينين فتون بها، فاستطردت السيدة ألفت

– لازم تعرفي تخدي قراراتك كويس يا فتون، اعملي فتون اللي أنتِ عايزاها مش الناس عايزاها.. ، سليم بيه راجل متفهم لو اتكلمتي معاه هتلاقيه في ضهرك واوعي تخليهم يأثروا عليكِ ويهزوا صورتك في نفسك حتى لو كانت الست عبلة والدتك

ارتسم الألم فوق ملامحها، فكم تمنت أن تتلقى النصح من والدتها

– ربنا جعل رزقك يا بنتِ في زوج حنين زي سليم بيه، أمسكِ فيه جامد يا بنتِ ومتسمحيش لحد يقلل منك..، هو مختاركيش وحياتك القديمة مجهوله بالنسباله بالعكس هو كان عارف وعايش تفاصيل حياتك مع حسن

وعند ذكر اسم من كان سببً في حياتها البائسة وما نتج عنها من ضعف شخصية، شحبت ملامحها

– أنسي أي حاجة كانت في الماضي ملهاش لازمه يا بنتِ، اتعلمي تكوني قوية ومتتنزليش عن حقك ما دام مبتجيش على حق حد

نهضت السيدة ألفت، وفضلت أن تحتفظ بذلك الحديث الذي استمعته بالصدفة بين شهيرة وتلك المدعوه ب دينا

اغمضت فتون عيناها بأرهاق، ثم التقطت هاتفها تنظر للوقت وعلى ما يبدو أن سليم مازال غاضب منها

هاتفته ولكن هاتفه كان خارج نطاق الخدمة

ظلت جالسة فوق الفراش تمسح فوق وجهها، تُفكر في حديث جنات والسيدة ألفت

– أنا فعلا محتاجه اتكلم مع سليم، واول حاجه محتاجه اتكلم فيها معاه إني مش حبه أروح المؤسسة تاني

ورغم عراقة المكان والخبرة التي تحصدها منه، إلا إنها تمتص منه طاقة سلبية مريرة كلما تسألت إحداهن كيف تمكنت من نيله وكانت مجرد مستخدمه لديه ، أو كلما قصوا حكاية عن أمرأة نالت رجلاً من زوجته فينظرون إليها..

ولولا خوفهم من فقد وظيفتهم لكانوا قالوها صراحة دون تلميح، فالكل يبلع حديثه الصريح خوفاً ولكنها تري وتسمع الهمسات و اللمذات، حتى السيد حازم صديق سليم مازال ينظر لها بنظرة غير راضية عن وجودها بينهم

إنها تهوى الطبخ وصنع الحلويات، تهوى مهنتها القديمة التي استطاع سليم اجتذابها منها بعد حرق المطعم ثم اعاد المكان بعد ترميمه لسلطة السيدة سحر مديرة الجمعية