لولا التتيم الجزء الأول بقلم ناهد خالد

– هندخل سينما! يعني هندخل الفيلم الأجنبي الجديد الي قولتلك عليه؟

رفع حاجبه بتلاعب قائلاً:

– أنا قلت ممكن.

– بدر!

رددتها بتحذيرٍ وهي تطالعه بجدية, فاتسعت ابتسامته يقول باستسلام:

– خلاص يا ستي هندخل الفيلم الي نفسك فيه… معرفش ايه سر غرامك بالسينما بس ماشي.

نهضت من مكانها تعانقه بذراعيها وهي تقبل وجنته مرددة بسعادة:

– روح قلبي أنتَ.

بادلها عناقها مبتسمًا بحبٍ, وما إن جلست حتى سمعته يقول:

– مفيش داعي بقى لخروجك مع نانسي, كلميها واعتذريلها.

اختفت الابتسامة من فوق وجهها وتركت الطعام من يدها وهي توجه نظراتها المتهمة له بينما رددت باستخفاف:

– نانسي! قولتلي.

نظر لها عاقدًا حاجبيهِ من تغيرها المفاجئ وهو يلتقط كوب الشاي:

– في ايه؟

ضغطت على أسنانها بغيظ حارق وهي تحدثه بملامح جامدة غير مبشرة بالآتي:

– بقى أنتَ هتخرجني عشان مخرجش مع نانسي مش عشان حابب تخرج معايا مش كده.. أنتَ امتى هتفهم إن نانسي صاحبتي ومش من حقك تحجم علاقتي بيها زي ما أنا مبتدخلش في علاقتك بناصر صاحبك رغم إني مبطقوش بس عمري ما ممنعتك تروح معاه مكان ولا قولتلك تقطع علاقتك بيه زي ما أنتَ بتعمل معايا.

وضع كوب الشاي الساخن فوق الطاولة بقوة مصدرًا صوتًا بهِ قبل أن يهتف بعصبية:

– مهو مش كل ما سيرة صاحبتك تيجي تنتهي بمشكلة.. ثم إن ناصر مش صاحبي بس ده جاري ومتربين سوا.. بعدين افتكر إني بطلت اقولك ابعدي عنها.

عقبت على حديثه بعصبية هي الأخرى:

– بس مبطلتش تبين اعتراضك على وجودها في حياتي زي دلوقتي كده.

زفر بقوة وهو ينهض ملتقطًا مفاتيحه وهاتفه:

– أنا همشي قبل ما الخناقة تقوم, وزي ما قولتلك اعتذريلها عن الخروج عشان مش موافق وإن كان على الزهق فأنا هخرجك.

أنهى حديثه وخرج تاركًا إياها جالسة مكانها تستشيط من الغيظ, ظلت لقليل من الوقت تحاول تمالك أعصابها وتفكر فيما حدث منذ قليل, فلم تشعر بذاتها إلا وهي ترفع هاتفها لتحدث صديقتها مؤكدة على موعدهما سويًا… وما إن انتهت حتى القت الهاتف فوق الطاولة وهي تردد بغضبٍ:

– عِند بعِند بقى.. عشان تبطل تتحكم في حياتي.

“ولم تنجح علاقة كان العِند طرفًا فيها”
————————————–

في اللحظة التي تدرك فيها أنك خسرت تكن هذه أصعب لحظات حياتك, ينتهي عندها الأمل ويتسرب إليك اليأس, يُوصم القلب بالحزن, وتتلون العينان بالحسرة على ما آلت إليهِ الأمور… وضع آخر حقيبة في سيارته من الخلف وأغلق بابها ثم نظر للواقفة أمامه وردد بنبرة متألمة: