على رقاب قدر نافذ بقلم شاهندة ج 4
تفاجأت (فدوى) من تواجده أمامها بينما أخذ هو و(ناجي) يتبادلان أطراف الحديث عن القضية فعرفت أنه اكتشف الحقيقة وبعد لحظات من الحديث استأذن (مهران) من (ناجي) ليتحدث مع( فدوى )بمفردهما فشعرت باحراج كبير بينما ظهر التوتر على( مهران) .. طالعها قائلا:
_ مش عارف أعاتبك ولا أعذرك ،لو كنتي استنيتي لحد ما جيت وقلتيلي ان ذاكرتك رجعت وحكيتيلي على كل حاجة ما كناش وصلنا لهنا ..عملتي فينا كده ليه يافدوى ؟
أجابته بارتباك :
_ الوضع اللي كنت فيه ماكنش يسمحلي أفكر كويس ، كنت مصدومة وخايفة ، قلت أبعد فكرة أن عمي ممكن يأذيك كانت بترهبني ..
قال بحب:
_ للدرجة دي بتحبيني ؟
قالت على الفور:
_ جدا !
قال بأمل:
_ طب أنا هنا ..عشانك ! عشانا ..خلينا نبدا صفحة جديدة ونرمي كل حاجة ورانا يافدوى ، نعيش حياتنا زي ماعايزينها وزي مابنختارها من غير خوف ولا غصب ولا مسؤوليات مالناش ذنب فيها ..
ظهر التردد على ملامح (فدوى) وقالت :
_ وبدارة يامهران ؟
فقال :
_ ما قدرش أسيب بدارة يافدوى !
فقالت بسخرية :
_ عايزنا احنا الاتنين ؟ لا قصدي احنا التلاتة ما أنا نسيت نوار !
فقال :
_ أنا طلقت نوار !
استقامت متجهمة وقالت :
_ والله ! إنت بتهزر حضرتك ؟ إنت مش عارف عايز إيه ، اقعد مع نفسك وفكر لما تعرف هنكلم وقتها ! عن اذنك الطيارة هتفوتني ..
سارت بضعة خطوات ليوقفها صوته :
_ عيزاني أختار بينك وبين بدارة مش كده ؟ تعرفي غلطتي أن حبيتك كإنك معجزة حصلت فى حياتي بس انتي حبتيني
كإني حاجة عادي بتحصل ، إنتي أنانية! دلوقتي بس شفتك على حقيقتك ، أربع شهور معيش بدارة فى هم معايا بسبب حبي ليكي ،هي مع انها عارفة أن قلبي معاكي ومقصر معاها عمرها ما اشتكت لا وكمان راضية انك تشاركيني معاها ، هي اللي حبتني وبتحسني معجزة فى حياتها مش انتي .. أنا غبي بجد ..بدارة شيفاني بالدنيا كلها وأنا سبت دنيتي كلها عشانك ، معقول أنا أعمى للدرجة دي ! ..
شعرت (فدوى )بإهانة كبيرة ، اقتربت منه وقالت بغضب :
_ لو الحب إن أشاركك مع غيري يبقى مش بحبك ، لو الحب إني اخدك من مراتك وابنك يبقى مش حب ، لو الحب إني أرضى أعيش معاك وانت مقسوم على تلاتة يبقى أنا مش بحب وأنانية !
دفعها بغضب وغادر إلى الخارج بعد أن قال لها :
-غوري من اهنا وماتورينيش وشك تاني !
