على رقاب قدر نافذ بقلم شاهندة ج 4
قال (عسران)بفخر:
-ولدي مهران.
شابت لهجة (رحمان)بعض السخرية وهو يقول:
-عريس الليلة..مبارك الجوازة التانية يامهران .
ضم (مهران)قبضته وكاد يلكم هذا المتبجح في وجهه وكلمة ” واخدين على بعض ” جعلت دمائه تغلي ولكن (عويس)أسرع يقول :
-ماتيجوا ناكل لجمة ويا بعضينا ،تلاجيكوا جيتوا من المطار على إهنه طوالي واحنا لازمن نضايفوك ياتوفيج.
قال (توفيق):
-إحنا مش ضيوف ياحاج وفي الحقيقة ملناش نفس ،خلينا هنا نحضر الفرح،من زمان محضرناش أفراح البلد ولا حسينا بجمالها.
قال(عويس):
-ومستعجل على إيه إياك؟لسة الأفراح جاية كتير،فرح ولدي ناجي وفرح ولدك رحمان..هم بينا خلينا ناكلوا عيش وملح ونصفي النفوس ياولد العم.
هز (توفيق)رأسه بينما أردف (عويس)قائلا:
-خليك مع ضيوفك يا عسران ،هناكلوا لجمة ونعاودوا بسرعة .
أومأ (عسران)برأسه ليتقدمهم (عويس) بينما سار (توفيق)إلى جوار(رحمان)هامسا له:
-أنا مش مرتاح يارحمان، إستقبالهم فيه حاجة مش طبيعية ،أقولك على حاجة خلينا هنا الليلة والصبح نسافر على روما بسرعة.
قال(رحمان)بإستنكار:
-نسافر؟! طب وفدوى؟
قال(توفيق)بغضب:
-مش وجته الحديت ده عاد إسمع كلامي وبعدين عفهمك.
هز (رحمان)رأسه موافقا رغما عنه،فعند لجوء والده للهجته الصعيديةيدرك أنه لا فائدة مطلقا من النقاش معه.
________________
كانت النسوة تلتف حول العروس الشاردة يرقصون ويغنون بينما يتقبل (عسران) وولده (مهران)التهاني من الرجال ،حتى إنفض الحفل وبدأ المدعوون القليلون في المغادرة ولم يبقى سوى أفراد العائلة،إقترب (محمد)من (بدارة)قائلا:
-كيفك ياخيتي؟
ربتت (بدارة)على صدره قائلة:
-أني زينة متجلجش ياأخوي !
قال(محمد) بشك :
-وشك أصفر يابدارة متأكدة إنك زينة؟
إبتسمت وهي تربت على بطنها قائلة:
-أني حبلى يامحمد وده طبيعي ياخوي،هو أني اللي عجولك برديك، متجلجش علي، أمي ثريا واخدة بالها مني ومعتفوتنيش واصل.
قال(محمد) وهو يطالع (مهران)الذي يقف متجهما بجوار عروسه:
-ومهران ؟!
طالعته (بدارة)بدورها وقد رقت ملامحها:
-سي مهران حنين جوي وواخد باله مني هو كمان،صدجني هو مغصوب ع اللي عمله ،وهي كماني زي ما انت واعى إكده، ومادام عارفة أنه عيحبني فآني راضية.
طالعها (محمد)قائلا:
-بتكدبي على خيّك يابدر دارنا؟
