على رقاب قدر نافذ بقلم شاهندة ج 4

طالعتها (فضيلة)بحنق قائلة:
-جلتلك جبل سابج بلاش كلام المتعلمين ده ،معفهمش منه حاجة واصل.

استقامت (فدوى)تقترب منها أمسكت يدها وقالت :
-غيرتك الزايدة عليه وخناقكم كل شوية بسببها هتخنقه مش هتسعده وتبينله أد إيه بتحبيه،خليه بطريقتك هو اللي يغير عليكي ويحاول يسعدك بكل وسيلة ، اديله مساحة يشتاقلك و يفتقدك ، وكمان بلاش كلامك الدبش فى وشه كل مرة ..خليكي ناعمة ورقيقة .

قالت(فضيلة)بمرارة:
– يغير عليا مين ؟..عزام ! اللي عيغير على حدا عيكون بيحبه وأني عزام ميحبنيش.

قالت(فدوى):
-مين قالك بس الكلام العبيط ده؟أنا متأكدة انه بيحبك ،انتي ست جميلة و طيبة وبتحبيه وبتتمنيله الرضا يرضى زي مابيقولوا، وأكيد بيحبك،فاضل بس إنك تهتمى بنفسك شوية زيادة،وتحاولي تشاركيه اهتماماته وتفاصيل حياته ،أنا ممكن أنزلك تطبيق على تليفونك حلو أوى يخليكي تفهمي إزاي تسعدي جوزك وتقربيه منك.

طالعتها ببلاهة فإبتسمت (فدوى)مردفة :
-هفهمك بطريقة عملية بس خلينا الاول نتفق إنك لازم تمشي من البيت وترجعي بيت أهلك زي ماقلتيله.

إتسعت عيون(فضيلة)قائلة:
-عاوزاني أسيب البيت ويخلالك الجو معاه ، شايفاني هابلة إياك؟

إتسعت إبتسامة(فدوى) لتصبح ضحكة مجلجلة وقالت :
-لأ طبعا مش هابلة، بس عزام لازم يحس بإن فيه حاجة ناقصاه بعدم وجودك،لازم يعرف كمان إنك مش وحدة ضعيفة بتهدد وتقول أي كلام وخلاص،لازم يعرف إنك جبتي آخرك ويقف مع نفسه يحاسبها ويشوف قصر في إيه؟ولازم يجيلك ويعتذر ويطلب السماح كمان.

شع الأمل في قلب(فضيلة)ولكنه مالبث أن خبا وهي تطرق براسها قائلة بحزن:
-وإفرضي مجاش وهملني في دار أبويا الله يرحمه.

قالت(فدوى):
-معتقدش تحصل، أكيد هيروحلك ويعتذر كمان ،ومتقلقيش لو عاند هخلي خالي يؤمره يروح يجيبك ويحب على راسك كمان، مش بتقولوها كدة برده؟

طالعتها (فضيلة )للحظة قبل أن ينفرج ثغرها عن إبتسامة رقيقة،لتقول (فدوى):
-قومي بقى إغسلي وشك وتعالي عشان أوريكى تفتحي التطبيق إزاي.

*********

وهناك من هذه الليلة جزء جميل ..لحظات دافئة تجعل من برودة المطر أكثر شاعرية،
شعر ( محمد )أنه أهمل (زهرة) في اليومين الماضيين فعزم بينه وبين نفسه أن يعوضها بشيء يدخل السرور إلى قلبها ..

بعد انتهاء حفل الزفاف الثقيل على قلوب الجميع أخذ (محمد) زوجته إلى المدينة ، أخبرها أنه يريد قضاء بعض الوقت معها بعيدا عن العائلة فتوجها نحو الفندق …