سبر اغوار قلبي بقلم نورهان سامي ج7

ربتت أسيل عليها بحنان و قالت بعدم فهم : طب فهمينى براحة ايه اللى حصل ؟

بكت تالا بأحضان أسيل و قالت من بين دموعها : مش كفاية أنه كداب و كان بيضحك
عليا الفترة اللى فاتت ديه كلها لا و كمان قسى عليا أوى .. مكانش أدهم اللى بحس معاه
بالأمان .. كنت مرعوبة منه يا أسيل .. أول مرة أشوف أدهم متعصب كده .. رفعت وجهها لها و قالت و عينها تلمع بها الدموع : قالى أنا ماكلش لبانة كانت فى بق غيرى يا أسيل .. شوفتى قالى ايه !

ربتت أسيل على كتفها بحنان و قالت بعدما نزلت دموعها هى الأخرى : خلاص بقى يا تالا حرام عليكِ خلتينى أنا كمان أعيط

جففت تالا دموعها بباطن يدها ثم جففت دموع أسيل قائلة بأسف : أنا أسفة ماكنش قصدى أخليكِ تعيطى

ضمتها أسيل لها بشدة و قالت بتساؤل : هو ايه اللى حصل لده كله ! .. ده أدهم بيحبك و أنتِ بتعشقيه .. ايه اللى حصل وصلكوا لكده

دفنت تالا رأسها بحضن أسيل و قالت بجدية : مش مهم اللى حصل المهم اللى هيحصل

نظرت لها أسيل بعدم فهم و قالت بتساؤل : و ايه اللى هيحصل ؟

تالا بجدية : هتطلق منه .. لازم أتطلق

أسيل بانفعال : أنتِ مجنونة يا تالا .. أنتِ بتحبى أدهم و هو بيحبك

رفعت رأسها لها و قالت من بين دموعها التى انسابت مجدداً : كان كله تمثيل يا أسيل ..
ادهم كان بيمثل عليا مش أكتر

عدلتها أسيل لتسند على كتفها و ربتت على كتفها قائلة : سيبك من كل الكلام ده عشان ملوش لازمة .. أنتِ لازم تكلى عشان ماتتعبيش

هزت تالا رأسها بالنفى و قالت بجدية : مليش نفس

أسيل بضيق : ماتبقيش عنيدة بقى يا تالا .. أمسكت ساندوتش من الموضوعين بالصنية على الكمودينو بجانبها و قالت بجدية : أمسكى كلى ده

تالا بضيق : قولتلك مش هاكل يا أسيل .. بلاش تزنى بقى

أسيل بإصرار : لا هتاكلى أنتِ مش شايفة وشك أسود إزاى ! هتتعبى لو ماكلتيش كده

ابتعدت تالا عنها و قالت بانفعال : مش هاكل يا أسيل

أسيل بانفعال هى الأخرى : لو مش هاتكلى عشانك يبقى عشان اللى فى بطنك

نظرت لها تالا بدهشة و قالت بتساؤل : مين ده اللى فى بطنى !

هزت أسيل كتفيها كناية عن عدم المعرفة و قالت : مش عارفة بس بسمعهم بيقولوا كده دايماً فى المسلسلات لما الواحدة مش بترضى تاكل

بعدما سمعت كلماتها انفجرت بالضحك من بين دموعها .. ابتسمت أسيل بسعادة لانها أضحكتها و قالت برجاء : كلى بقى عشان خاطرى