سبر اغوار قلبي بقلم نورهان سامي ج6
نظرت صابرين لمروان و قالت بجدية : أنزل دلوقتى يا مروان و أنا هابقى أندهلك بعدين
اؤمأ مروان برأسه و غادر بهدوء !
جلست صابرين بجانبها و قالت بضيق : ينفع كده .. ينفع أعرف منه إنكوا متخانقين و كمان من شهرين .. و أنا كل أما أكلمك أسال عليكى تقوليلى كويسة كويسة .. و ماعرفش إنك حامل غير لما مروان يقولى .. تنهدت بضيق و أردفت بجدية : سيبك من الكلام ده أنا عارفة إنه غلط لما اتجوز عليكى بس هو طلقها يبقى خلاص بقى .. نرجع الميه لمجاريها و ترجعوا لبعض
بكت لميس بحضن هالة و هى تقول بدموع : أرجع إزاى .. أرجع بعد ما أتجوز عليا واحدة من الشارع و بيئة و غير ده كله جبهالى البيت و يقولى هاتخدمينى و تخدميها .. أرجع بعد ما هددنى إنه هايحبسنى لو موت إبنه .. أرجع بعد ما كان بيضر,بنى و يشت,منى و حارمنى من أقل حقوقى إنى أجيلكوا لوحدى أو أشوف الشارع .. حرمنى من الجامعة و من حاجات كتيرة أوى .. كان إختيار غلط من البداية و أنا هاصلحه بطلاقى منه
صابرين بجدية : يا هبلة .. مهو طلقها أهو و رجعلك أنتِ فى الأخر .. أنتِ الأصل بعد كل حاجة و بعدين هو أنتِ أول واحدة جوزها يتجوز عليها .. ده فى ناس اجوازتهم بيتجوزا عليهم و بيعيشوا مع ضررهم و بيبقوا زى الإخوات و بيكلوا فى طبق واحد .. لكن هو طلقها علطول و رجعلك أنتِ فى الأخر .. صمتت قليلاً و قالت : عنده حق يهددك .. بتقوليله هاموت إبنك و أنزله و عايزاه يفضل هادى و يقولك شاطرة يا حبيبتى موتيه
لميس بدموع : مش هاقدر أرجعله .. أنا بترعب منه .. مش هاقدر
صابرين بجدية : بلاش كلام فارغ و كلام الناس التافهين دول .. حافظى على بيتك و جوزك و خصوصاً إنك دلوقتى حامل و هايبقى فى بينكوا طفل .. هاتربى إبنك إزاى من غير أب .. هاتربى إبنك لوحدك إزاى ؟
نزلت دموعها و قالت بصوت متحشرج : مش أحسن ما أربيه مع أب عايش عشان يهين أمه .. مابيعملش حاجة فى حياته غير إنه بيهين أمه .. تفتكرى نفسية إبنى هاتبقى ايه ؟
صابرين بجدية : هو قالى إنه مش هايمد إيده عليكى تانى و مش هايضايقك .. الراجل عداه العيب سابك فترة تهدى فيها مع نفسك يبقى ليه ماترجعيش و تحافظى على بيتك من الخراب .. أردفت بتساؤل قائلة : عايزة تبقى مطلقة عشان الناس تتكلم عليكى .. مهما كنتى شريفة عفيفة مش هاتسلمى من كلام الناس و هايفضلوا يلسنوا عليكى فى الرايحة و الجاية .. يا بنتى حافظى على جوزك و إبنك اللى جاى .. ربى إبنك فى وسطكوا عشان مايطلعش من غير أب و يحس إنه يتيم و أبوه عايش و أوعى تكونى فاكرة إنك هاتتطلقى من هنا هاتلاقى طابور عرسان من هنا .. لا يا حبيبتى ده اللى ماتجوزتش قبل كده مش لاقية يبقى أنتِ هتلاقى .. مطلقة و بعيل هتلاقى ! .. حتى لو لقيتى أنتِ مابتسمعيش الحاجات اللى بتحصل و جوز الأم عمره ما بيعامل ولاد مراته على إنهم ولاده .. و تخيلى لو جيبتى بنت .. هاتعيشى بنت مع راجل غريب مش أبوها ممكن يطمع فيها فى أى وقت
