لمن القرار سهام صادق ج 11

– اه بغير، والواد عزالدين ده هعلقه لما ارجع ومش قايلك كنت عايزك في إيه سلام

اتسعت عيناها في ذهول، تنظر للهاتف وقد أغلق الخط بوجهها بالفعل

– ده قفل في وشي المكالمة فعلا

ولكن بمجرد أن تمتمت حديثها ، كان يُعاود الأتصال

– جسار عازمنا على فرحه، ولعلمك مش هنحضر لأني مش فاضي

وعاد يُغلق الخط، لتتسع عينيها هذه المرة ذهولاً بما سمعته

جسار سيتزوج بهذه السرعه بعد تجربه زواج فاشلة؟
فمن ستكون هذه العروس؟
……

لقد باتت معتادة على حديث شقيقها المسموم، حامد لن يتغير مهما مر الزمن

– طردك ابن صفوان النجار من بيته، شهيرة الأسيوطي حتت بنت خدامة أنتصرت عليها

– سليم مطردنيش يا حامد، أنا اللي خلاص قررت أنسحب من حياته

اقترب منها حامد مُدقق النظر في ملامحها، يرى الهزيمة في عينيها وأكثر ما يُسعده أن يرى هزيمة الأخرين مهما كانت مكانتهم لديه

– طيب وبنتك سيبتهاله

لم تُريحه شهيرة في منح الجواب، فاحتدت عيناه يرمقها ساخطاً

– لو جبتي البنت تعيش معاكي تبقي فعلا بقيتي غبيه يا شهيرة، بكره فلوسه كلها تكون لولاد الخدامه وبنتك تاخد الفتافيت

– أنت إيه يا أخي، كل حياتك فلوس في فلوس

صدحت ضحكات حامد عالياً متلذذاً من رؤية ضيقها

– بكره لما نفلس بسبب غبائك، ابقى اجري على ابن النجار اترجيه يمولك بالفلوس

توقفت شهيرة مكانها بعدما كادت أن تُغادر المكان وتبتعد عنه

– أنت بتقول إيه؟

– بقول إننا على وشك الإفلاس يا هانم، وأنتِ كنتي بتسعي ورا راجل مهما قدمتي ليه من تنازلات برضوه مش شايفك

طعنتها كلماته ولكنها لم تعد تبالي بخزيها

– الشركة بتقع يا شهيرة وحتى مشروعنا مع ماهر اللي كنت حاطط أمل فيه انسحب منه الاستاذ تخيلي ابن السواق يرفض شراكتنا, لا ويسعى إنه يشارك ابن صفوان النجار مش بقولك طول عمره ذكي ابن صفوان مبيطلعش خسران

– الشركة بتقع إزاي، ده هما شهرين اللي اهملت فيهم الشركة

وببساطة كان يُجيبها رغم فداحة أخطائه وغبائه ولكنه لن يعترف بهذا

– آخر صفقة اضحك علينا فيها

اتسعت عينين شهيرة في صدمة لا تُصدق ما تسمعه

– مجرد صفقة توصل الشركة للأفلاس

– الصفقة كانت تقيله، وعلى قد تقلها كانت الخسارة

لم تتحمل شهيرة سماع المزيد منه، تكاد تُجن مما تسمعه

– ضيعتنا بغبائك، اكيد دخلت صفقة مشبوها من صفقاتك

تبدلت ملامح حامد، فادركت السبب وراء خسارتهم