فرط الحب دينا ابراهيم ج3
– يا بجاحتك وكمان نايم قوم يا شيخ قامت قيامتك.
استيقظ الشاب في رعب مبررًا غفوته:
– تعبان ودايخ هموت يا كفرة ،روّحوني.
حركت شفتيها لليمين والشمال لتبصق كلماتها في غضب:
– ولما انت مش قد الشقاوة بتتنيل على عينك ليه؟
أمسك رأسه متأوهً قبل ان يخبرها:
– دماغي هتنفجر مني أنا لازم أروح لدكتور، جوزك جابلي ارتجاج في المخ.
– وماله انزل.
ردت “وسام” وهي تخبط بإحدى قدميها ارضًا في غضب وتوتر ليسأل الشاب في لهفة:
– بجد هو مشي؟!
– لا قاعد في الشارع على باب العمارة مستنيك بس لو حابب تنزل اتفضل.
ابتلع الشاب ريقه في ارتباك ثم صمت ليتأوه من جديد ممسكًا صدره، فقالت له “وسام” في شماتة:
– احسن عشان تحرم تيجي على ستات الناس،
المهم اسمع انا عندي فكرة فوق معايا كده وإياك تنام إنت فاهم دي فرصتك الوحيدة.
هز الشاب رأسه في موافقه واتسعت عيناه في ترقب وهو يستمع لمخططها.
*****
استقام “بيجاد” يلوي جسده لليمين والشمال في ملل وارهاق ثم صاح مرة أخيرة بصوت رج المكان:
– تليفونك ومفاتيحك معايا خليك بقى مستخبي زي الحريم.
اقترب منه صاحب المتجر المسن نسبيًا ليخبره:
– وحد الله يا ابني وخلاص ما انت اديته اللي فيه النصيب سيبه يمشي وخلصنا من الليلة دي،
ولّا يرضيك الرجالة دي قاعدة متمرطة وخايفين عليك تجيب أجله.
– وأنا مش هيكفيني فيه غير أجله يا عم أمين دي مراتي عارف يعني ايه مراتي!
ده انا هقطع صوابع ايده واحطها في عينه بأيديا دي.
– استغفر الله، يا ابني يعني هتودي نفسك في داهيه عشان حتة عيل مترباش؟
– على الأقل يتربى لكن وربي ما اسيبه يمر كده مرور الكرام ولو على جثتي!
قال بيجاد في حقد وغضب ليقطع حديثهم صوت وسام الهاتفة من الشرفة:
– بيجاد.
أسرع يطالعها في غضب لخروجها ومناداته وسط الطريق مشيرًا لها بالدخول لكنها أصرت على وقفتها وهي تزيد من الإشارة له بيدها كي يصعد.
زفر قبل ان يستأذن ويصعد إليها كي يوبخها لعلها تتعقل قليلًا، وحين وصل وجدها تقف على الباب في انتظاره ممسكه بطنها المنتفخة بملامح يشوبها الألم فأسرع نحوها في تساؤل:
– إيه مالك؟
– بطني بتوجعني ومتشنجه أوي.
أمسك “بيجاد” ذراعها يدفعها بخفة للداخل قائلًا في خوف وقلق:
– طيب واقفه ليه ادخلي ارتاحي على سريرك شوية.
– لا لا لا….
أسرعت وسام قائلة في نبرة عالية وحين نظر لها بتساؤل اقتربت منه بجسدها تستند برأسها فوق صدره قائلة في توتر تحاول كبحه دون جدوى:
