نعيمي وجحيمها بقلم امل نصر جزء 9

❈-❈-❈

وفي الأعلى
في غرفة عامر ولمياء التي بدلت ملابسها ثم جلست شاردة حتى انتبه لها زوجها الذي سألها بريبة:
– إيه يا لميا؟ شايفك سرحتي يعني وكأنك روحتي لدنيا تانية، غير اللي احنا فيها.
التفت إليه برأسها بوجه متسائل، فقالت بتردد:
– بصراحة خايفة اتكلم لا تزعل.
تبسم لها عامر وقد بدا أنه فهم ما يدور برأسها ، وقال يستحثُها على الكلام:
– لا قولي يا حبيبتي ومش هزعل، ما انا خلاص اتعودت بقى
رغم انتباهها لنبرته المتهكمة ولكنها لم تقوى على الكتمان لتردف سريعًا له :
– بصراحة بقى انا كنت هتجنن على حفل النهاردة، اللي كان يهوس، وكنت أتمنى من قلبي دا يبقى فرح ابني.
أصدر تنهيدة طويلة بقنوط، يتطلع ألى زوجته وطبعها الذي لن يتغير أبدًا، واستطردت هي مواصلة :
– بلاش البصة دي والنبي عشان عرفاها كويس، أنا أم وشئ طبيعي لما افكر كدة، دا ابني وحيدي يا عامر، وكان نفسي افرح بيه.
فاض بيه عامر ليرد وهو يضرب بكفه على ذراع المقعد الذي يجلس عليه:
– يا شيخة حرام عليكِ، دا انتِ عملتي ما بدالك في جوازته الأولى بميري بنت اختك، امال زهرة تعمل اللي ما تعملهاش نص اللي اتعمل لصاحبتها حتى، ودي جوازتها الأولى .
غمغمت باعتراض وصل إلى عامر وهي تشيح بوجهها عنه:
– ما هي اللي قبلت بالوصع معاها، احنا مالنا؟ هي كانت تتطول أساسًا؟
– اللهم ما طولك ياروح .
هتف بها عامر بزفرة طويلة كي ترتجع زوجته عما تفكر به، شعرت لمياء ببواد غضبه ففضلت ان تنهي حتى لا تزيد ويصل النقاش بينهم إلى خلاف، وقالت مغيرة :
– بس انا مكنتش اعرف ان كارم عيلته كلها رتب مهمة للدرجادي، دا انا جاني احساس اني في مقر أمني من كتر الرتب اللي شوفتها.
اعتدل بجلسته ليندمج في حديثها مقدرًا تفهمها بتغير مجرى الحديث:
– بس انا عارف من الأول على فكرة ومستغربتش انه يعزمهم، والد كارم الله يرحمه كان اول واحد يدخل المجال الأمني منهم وبعدها ناس كتير من عيلته قلدوه عشان السطوة والهيبة، كارم نفسه كان من ضمنهم ، بس للأسف حصلت معاه مشكلة كبيرة أدت لفصله من السنة التالتة في الأكاديمية .
هتفت مندهشة بعدم تصديق:
– إيه؟ انفصل من سنة تالتة؟ ازاي يعني ينفصل ووالده رتبة مهمة في الدولة؟ هو عمل إيه بالظبط؟
بهزة بسيطة من كتفيه اجابها بعدم معرفة:
– بصراحة مش فاكر، اصل والده ساعتها حكالي الموضوع على عجالة من غير تفاصيل .