سبر اغوار قلبي بقلم نورهان سامي ج10

ابتسم ماجد و قال بجدية : عايزك .. عايز توتة قلب ماجد ترجع لماجد حبيبها تانى

اقشعر بدنها باشمئزاز و قالت بضيق : توتة قلب ماجد ماتت من زمان .. ماتت لما سيبتها .. ماتت لما انتحرت .. أنا مش توتة قلب زفت .. أنا تالا حرم أدهم يوسف سنهابى و هفضل تالا حرم أدهم يوسف و مش هبقى غير كده .. نظرت له شذراً و كادت أن تغادر لكنه أوقفها عندما أمسكها من ذراعها بيده السليمة .. حاولت سحب ذراعها منه و هى تقول بحدة : سيب إيدى يا حيوان

ترك يدها لتظن هى أنه حررها لكنه فعل هذا فقط لتكف عن صراخها الذى سيجمع جميع الناس القليلة المارة بالشارع من حولههما كما أنه كان يحتاج يده بشئ أخر .. فتح باب السيارة ثم أسرع نحوها ليجدها تمشى ببطء بسبب خطواتها العرجاء .. أمسكها من يدها و التفت ليجذبها وراءه و هو يقول بجدية : تالا أنا عايز أتكلم معاكِ كلمتين مش أكتر .. لازم أتكلم معاكِ

صاحت قائلة بضيق : و أنا مش عايزة أتكلم معاك .. مجرد وقوفى معاك و مسكتك لذراعى كده خيانة لأدهم و أنا مقدرش أخونه .. حاولت تخليص يدها من قبضته لكنها لم تستطع .. جذبها و كان يريد إدخالها عنوة للسيارة لكنها استطاعت أن تفك حصار يدها من يده و هى تقول بحدة : ابعد عنى .. أنت مكفكش العلقة اللى خدتها من أدهم

ماجد بجدية : تالا أنا عايز أتكلم معاكِ .. لازم نتكلم .. لازم أوضحلك سوء التفاهم اللى حصل زمان و نصلحه دلوقتى .. لازم تعرفى إنى لسة بحبك .. لازم تعرفى أن جوازى من نفين ميعتبرش جواز .. أنا عمرى ما شوفتها غيرك .. كنت دائماً بتخيلها أنتِ .. عارفة أنا قعدت شهرين ماقربلهاش عشان كنت بحبك و لسة بحبك .. تالا لازم تعرفى إنى كنت بتعذب طول ما أنتِ بعيدة عنى .. تالا سامحينى على غلطتى اللى فاتت و تعالى نبدأ من جديد .. تعالى نرجع قصة حب ماجد و توتة قلبه اللى الناس كانت بتحكى و تتحاكا بيها .. تعالى نرجع حبنا اللى القدر فرقه زمان .. مفيش واحدة قدرت تدخل قلبى بعد ما أنتِ دخلتيه .. أنا عمرى ما نسيتك لحظة يا تالا .. طول عمرك قدامى .. حتى بينتى سمتها على أسمك عشان أشوفك فيها .. تالا سامحينى على اللى فات و تعالى نبدأ صفحة جديدة مع بعض .. أنا هطلق نيفين و أنتِ اتطلقى من أدهم و نرجع لبعض .. نرجع حب زمان

نظرت له تالا نظرة نارية و لكنها قالت ببرود : خلاص خلصت .. خلصت كل اللى كنت عايز تقوله ؟ أردفت قائلة بضيق : ورينى عرض كتافك بقى عشان أنا بحب و مش هحب حد غير جوزي .. حبك كان غلطة بضرب نفسى ميت جزمة عليها دلوقتى .. كل اللى بتقوله ده كلام ميهمنيش أعرفه و لا يهمنى أسمعه عشان جوزي هو الشخص الوحيد اللى فى قلبى و هيفضل فى قلبى لكن أنت مجرد صفحة فى صفحات كتاب قديم صفحاته صفرة و حشرة الكتب قضت عليه فتخلصت منه من زمان .. نظرت له بإذدراء نظرة أخيرة و كادت أن تغادر لكنه أوقفها عندما أمسك ذراعها قائلاً : تالا أنتِ لسة بتحبينى .. ممكن تنكرى لكن قلبك اللى بيحس بيا ميقدرش ينكر .. تالا عارف إنى غلطت و جرحتك زمان بس أنا جاي ندمان دلوقتى و عايز نرجع زي زمان